Монголын газар нутгийн нэг хэсгийг Хятад компанид худалдах гэж байна гэсэн мэдээлэл энэ сарын сүпер сенсаци байлаа. Хятадын “Чалко” группт Айванхоу майнз компаний “Саутгоби сандс”-ын дийлэнх хувийг зарах хэлэлцээр энэ бүхнийг эхлүүлсэн юм. Хоёр долоо хоногийн турш иргэд, УИХ-ын гишүүд, эдийн засагчид #SGSands гэсэн түлхүүр үгэнд тулгуурлан ярьж, хэлж ирснээр Засгийн газар ажиллаж эхлэв. Монголын газар нутгийг зарах үйл ажиллагааг түр хойшлуулав.

    Нөгөө талаас энэ үйл хэрэг ач холбогдолтой, сургамжтай байлаа. Монголчуудын амны уншлага мэт болсон хуулийн олон цоорхойноос уул уурхайн салбарын цоорхойнуудыг цөөлөв. Том цоорхойг нь багасгаж УИХ-аар хууль батлуулах гэсэн гишүүдийн санасан хэрэг сэтгэлчлэн бүтлээ. Тэгвэл нөгөө талаас эдийн засгийн хувьд эрсдэл дагуулсан, уул уурхайн харилцаа, хөрөнгө оруулагчдын байр суурийг хөндсөн үйл хэрэг болсон гэж үзэх хүмүүс ч байна. Харин олон улсын хэвлэл мэдээллийн хэрэгслээр #SGSands-ын явдалд хэрхэн хандаж байгааг 24tsag.mn нэгтгэлээ.

CNN: Хятадын хамгийн том хөнгөн цагаан үйлдвэрлэгч компани Монголд үйл ажиллагаагаа явуулж буй Саутгоби Сандс компанийг өөрийн болгохоор зэхжээ. Саутгоби Сандс нь Канадын Торонто хотод төвтэй нүүрсний компани юм. Гэтэл Монголын өмнө зүгт хил залгаа оршдог хятадууд энэ компаний хамгийн том хөрөнгө оруулагч болох гэж байгаа аж.

SeekingAlpha: Монголын Засгийн газраас “Айванхоу Майнз”-аас “Чалко”-д шилжүүлэх Саутгоби ресурсын худалдааг эсэргүүцжээ. Уг компанийг 926 сая ам.доллараар зарахаар тохиролцсон бйсан ч улс төрчдөөс эсэргүүцл хүлээлээ. Гэхдээ энэ нь зөвхөн энэ долоо хоногтоо биш энэ жил болох сонгуультай холбоотой байж болох юм.

TimesColonist: Энэ сарын 4-нд Канадын “Айванхоу Майнз”, Хятадын “Чалко” корпораци худалдааны гэрээ байгуулсан байна. Гэвч “Саутгоби”-н 57.6 хувийг худалдах дээрх хоёр компаний хэлцлийг Монголы Засгийн газраас эсэргүүцлээ. Энэ үйл явдал нь цаашид зургаан тэрбум ам.долларын нөөцтэй Оюутолгойн зэс, алтны ордыг эзэмшиж буй “Айванхоу Майнз”-ын асуудлыг дахин анхаарахад хүргэж байна.

TheStandard.com.hk: “Айванхоу Ресурс”-ын эзэмшиж байсан “Саутгоби Сандс”-ыг худалдах эрхийг Монголын Засгийн газар түр хойшлуулснаар хувьцааны ханш огцом уналаа. Өнгөрсөн Даваа гаригт дээрх компаний хайгуулын болон ашиглалтын лицензийг цуцалсан. Үүнд Овоот толгойн нүүрсний орд ч мөн хамрагдаж байгаа аж. /Ройтерс/

ChinaDaily: Канадын компаний төлөөлөл “Саутгоби Сандсын ашиглалтын эрх муу нөхцөлд байгаа гэж үзэх үндэслэл алга” гэж хэллээ. Хоёр компаний хэлэлцээрийг цуцалснаар Хонг Конгийн хөрөнгийн бирж дээрх ханш 10 хувиар унасан бөгөөд энэ нь сүүлийн долоон сард үзэгдээгүй уналт гэнэ.

Bloomberg: Монгол улсын Засгийн газраас “Саутгоби Сандс”-ын худалдааны асуудлыг эргэн харахыг хүссэн байна. Оюутолгойн энэ жилийн зарлага нь урьдчилсан тооцоогоор 2.1 тэрбум ам.доллар байсан бол гуравдугаар сарын 19-ний байдлаар Оюутолгойд 917.7 сая ам.доллар төвлөрсөн байжээ.