Манай улсын гурван оюутан ОХУ-ын Екатеринбург-д хар тамхи татсан хэрэгт буруутгагдан баривчлагдлаа. Энэ тухай мэдээлэл Оросын http://fedpress.ru вэб хуудаснаа нийтлэгджээ. Дөрөвдүгээр сарын 10-ны шөнө тэднийг хуулийн дагуу албадан баривчласан байна. Тэдгээр оюутнууд зочид буудлын ойролцоо пиво ууж байгаад ийнхүү баригджээ. Мансууруулах төрлийн бодис хэрэглэсэн эсэхийг тогтоохоор орон нутгийн наркологийн төвд шинжилгээнд хамруулжээ.
        Эхний шинжилгээгээр тэднээс MDMA гэсэн мансууруулах төрлийн бодис илэрлээ гэж тус төвөөс мэдэгджээ. Оюутнууд шинжилгээний хариуг хүлээн зөвшөөрөхгүй.
        Дахин шинжилгээ авах, шинжилгээний хариуг нягтлах хүсэлт гаргасан байна. Энэ дагуу хотын 14-р эмнэлэг рүү тэр өдрийнхөө орой 22:00 цагт хар тамхи татсан хэрэгт сэжиглэгдээд буй гурван оюутан, цагдаагийнхан очжээ. Хоёрдахь шинжилгээгээр тэдний биенээс мансууруулах төрлийн бодис хэрэглэсэн гэх шинж тэмдэг огт илрээгүй байна.

Гэсэн хэдий ч дөрөвдүгээр сарын 12-ны өдөр ОХУ-д суралцаж буй манай оюутнуудыг сургуулиас нь дуудаж тэр өдөр юу болсон талаар протокол бичүүлжээ. Тэд ял шийтгэл эдлэхийг зөвшөөрөхгүй гэдгийг протоколд дурдсан байна. Дараагийн өдөр буюу энэ сарын 13-нд тус мужийн Кировын шүүхээс гурван оюутанг дуудуулжэ.
    Хоёрдахь шинжилгээний хариуг үл харгалзан, шүүгч тэднийг гэм буруутай гэж үзэн захиргаадан баривчлаад байна. Үүссэн нөхцөл байдалтай холбогдуулан хүний эрхийн комиссар хатагтай Татьяне Мерзляковой тэднийг гэм буруугүй гэдгийг нотлохоор ажиллаж байгаа юм.
Хар тамхи татсан гэж гүтгэгдэж байж болзошгүй манай оюутнууд сургуульдаа нэр хүндтэй, дээд боловсролтой, онц сурдаг, олон нийтийн ажилд идэвхтэй, сургуулийнхаа урлаг, соёлын арга хэмжээнд тогтмол оролцдог, спортоор хичээллэдэг, уралдаан тэмцээнд тогтмол оролдцог.
        Тэднийг найз нөхөд, ангийнхан нь хүндэлдэг бөгөөд "Бид тэднийг хар тамхи хэрэглэсэн гэдэгт итгэхгүй байна. Тэд гэм буруугүй" гэж үеийн нөхөд нь өмгөөлж байна. Цагдаа нар үүссэн нөхцөл байдалтай холбогдуулан тайлбар хийсэнгүй. Гэм буруутай нь нотлогдоогүй байхад манай улсын оюутнуудыг тус улсын цагдаа, шүүх хар тамхинд донтогчид гэж нэрлэн, суралцах эрхэнд нь халдаж, улмаар ОХУ-аас хөөн гаргаж магадгүй нөхцөл байдал үүсээд байна.

Өчигдөр буюу дөрөвдүгээр сарын 18-нд хүний эрхийн комиссар Т.Мерзляковой оюутнуудтай уулзан "Хар тамхины эсрэг төв"-тэй холбогдож, ОХУ-аас албадах гаргуулахгүй байх тал дээр арга хэмжээ авахаа амлажээ.
Манай улсын гадаад харилцааны яамны Консулын газарт энэ тухай мэдээлэл ирсэн эсэх, Монгол гурван оюутны хар тамхитай холбогдон үүсээд буй хэрэг, нөхцөл байдал хэрхэн шийдвэрлэгдэх талаар бид эргэн сурвалжлах болно.
    Эх орондоо ч бай, харийн оронд ч бай хийгээгүй хэргийнхээ төлөө энэ мэтчилэн гүтгэгдэж, гэм буруутан болж болзошгүй тул алхам бүртээ сонир сэрэмжтэй байхыг анхааруулсан үйл явдал гарсаар байна.