МАХН-ын дарга Н.Энхбаяр Төв аймгийн урьдчилан хорих төвд цагдан саатуулагдаад даруй арав хоног өнгөрчээ. Энэ хугацаанд МАХН-ын гишүүд түүнийг суллуулахаар бүхий л аргаа хэрэглэж байна. Сүхбаатарын талбай, АТГ-ын үүдэнд жагсаж, УЕПГ, ШШГЕГ, АТГ-ын удирдлагуудад Н.Энхбаярыг суллуулах албан бичиг хүргүүлэх, байн байн хэвлэлийн хурал зарлан мэдэгдэл хийсэн ч тусыг эс олсон. Бүр буруугаар эргэсэн гэхэд хилсдэхгүй. Учир нь тус намын гишүүн, “Н.Энхбаярыг суллуулах аян”-ыг зохион байгуулагч З.Баянсэлэнгэ өчигдөр 14 хоногийн хугацаатай хоригдохоор Дэнжийн мянгын цагдан хорих 111 дүгээр төв рүү ачигдав.

Түүнийг хорих болсон шалтгаанаа Сүхбаатар дүүргийн цагдаагийн хэлтсээс хууль бус жагсаал цуглаан зохион байгуулсан, жагсаал хийх зөвшөөрөл аваагүй хэмээн тайлбарласан. Харин З.Баянсэлэнгэ “Би хууль бус нэг ч үйлдэл хийгээгүй. СБД-ийн засаг даргын тамгын газарт жагсаал цуглаан байгуулах хүсэлтээ албан ёсоор хүргүүлсэн. Бүх зүйл маань хууль журмын дагуу хийгдэж байгаа. Үндсэн хуульд заасан эрхээ эдэлсний минь төлөө намайг хорих ялаар шийтгэсэнд гомдолтой байна” гэсээр хоригдсон юм.

Мөн энэ долоо хоногийн хувьд хамгийн сонирхолтой нь МАХН-ын дарга, ерөнхийлөгч асан Н.Энхбаяр Төв аймгийн урьдчилан хорих төвөөс өмгөөлөгчөөрөө дамжуулан ард түмэндээ хандан захидал илгээсэн явдал байв. Тэрээр захидлаа “Би айхгүй” хэмээн гарчиглан, хоригдсон үйл явц, хоригдох болсон шалтгаанаа тайлбарлан бичсэн байлаа.

Уг захидлыг илгээснээс хойш хэд хоногийн дараа МАХН-ын дарга Н.Энхбаярт өмгөөллийн туслалцаа үзүүлж буй өмгөөлөгч О.Баасанхүүг АТГ-аас дуудан, өмгөөлөл үзүүлэх эрхгүй хэмээн мэдэгдэв. Уг шалтгаанаа АТГ-аас “Эрх зүйн туслалцаа үзүүлэх тухай гэрээний 4-ийн 4 дэх хэсгийн “Зөвхөн хууль тогтоомжийн мэдээллээр үйлчлэх ба Авлигатай  тэмцэх газрын шалгаж буй ажлын хэсгийн байцаалтын үед үйлчлүүлэгч өөрөө өөрийгөө өмгөөлөхөд хууль зүйн туслалцаа үзүүлэн, байлцсан асуудлаараа үйлчлүүлэгч зөвшөөрөөгүй тохиолдолд гарын үсэг зурахгүй байж, зөвхөн хүний эрхийг зөрчиж буй эсэхийг хянах байдлаар мөрдөн байцаалтад оролцох үүрэгтэй гэсэн заалт нь Монгол Улсын Эрүүгийн байцаан шийтгэх хуулийн 146.9-д заасан “тэмдэглэлд  хэрэг бүртгэгч, мөрдөн байцаагч, байцаалтад байлцсан бусад хүмүүс гарын үсэг зурна”  гэсэн заалттай зөрчилдөж байна хэмээн тайлбарлалаа.

Мөн Н.Энхбаярыг хэрэгтэй холбогдуулан Гандантэгчилэн хийдийн хамба лам Д.Чойжамц АТГ-т дуудагдан мэдүүлэг өгөв.

Түүнчлэн энэ долоо хоног зөвхөн Н.Энхбаяр асуудлаар дүүрэн байсангүй. Долдугаар сарын 1-ний хэрэгт буруутгагдаад буй цагдаагийн экс дарга нарын шүүх энэ долоо хоногт хоёр удаа товлогдсон ч хоюулаа хойшилсон. Учир нь эхний хуралд шүүгдэгч нарт өмгөөлөгч томилсон ч шүүгдэгч нар өмгөөлөгчөөсөө татгалзаж, эргээд хариуд нь өмгөөлөгч нар өмгөөлөл үзүүлэхээ татгалзсан. Гэвч Сүхбаатар дүүргийн шүүгч Ч.Хосбаяр хүсэлтийг хүлээж авалгүй өмгөөлөгч нарт хавтаст хэрэгтэй хурдан танилц хэмээн гурван хоногийн хугацаа өгөн, хурлыг энэ сарын 19-нд товлосон билээ. Гэвч уг өдөр Цагдан хорих төвд нэг ч өмгөөлөгч ирсэнгүй. Учир нь хурлын өмнөх өдөр Монголын өмгөөлөгчдийн холбоо хуралдаж, өмгөөлөгчдийн хууль бусаар томилсон хэмээн өмгөөлөл үзүүлэх эрхийг нь цуцалсан юм. Ингэснээр цагдаагийн экс дарга нар дахин өмгөөлөгчгүй болж, шүүх хурал тодорхойгүй шалтгаанаар хойшилсон билээ.

Б.Чимэг