“Шударга ёсны хувьсгалт” үндэсний нэгдсэн оюутны холбооны тэргүүн Д.Мөнхтөрөөс цөөн зүйлийг тодрууллаа.

-Өөрийг чинь уржигдар СБД-ийн цагдаа нар баривчилсан гэж гэж сонслоо. Яг юу болсон юм бэ?

-Монголын улсын гуравдах Ерөнхийлөгч Н.Энхбаярыг хууль хүчний байгууллагынхан хүч хэрэглэн зүй бусаар баривчилсныг эсэргүүцэж “Шударга ёсны хувьсгалт” үндэсний нэгдсэн оюутны холбооныхоо 40 гаруй гишүүдийнхээ хамтаар 2012-04-13-ны өдөр бид Сүхбаатарын талбай дээр жагсаал хийж эсэргүүцлээ илэрхийлсэн юм. Тэгтэл СБД-ийн цагдаагийн хэлтсийн нэг хурандаа ирээд “Та бүхэн үгээ хэлж эсэргүүцлээ илэрхийлэх эрхтэй. Гэхдээ туг лоозонгүй хий” гэсний дагуу бид туг лоозонгүй жагсаал хийсэн. Тэгээд үүнийхээ дараа буюу уржигдар бид  “Шударга ёс хаана байна?” “Ерөнхийлөгч асан Н.Энхбаярыг нэн даруй сулла”, “Хуулийнхан хууль бус ажиллагаагаа зогсоо” гэсэн бичгүүдийг бариад зогсож байтал СБД-ийн цагдаа нар ирээд чамаас асууж тодруулах зүйл байна гээд СБД-ийн цагдаагийн хэлтэс рүү авч явсан. Тэнд очтол цагдаагийн 6 офицер надтай уулзаад хэрэг бүртгэх албаны дэслэгч Амарбат дээр очоод хэдэн зүйлд хариулчихаад явж болно гэсэн. Гэвч тэд хэрэг бүртгэгчээр надаас мэдүүлэг авуулсныхаа дараа шууд Дэнжийн Мянгад байрлах урьдчилан хорих түр саатуулах 111-р ангид аваачиж нэг хоног хорьсон.

-Ямар шалтгаанаар хорьж байгаа юм?

-Би харин гарч ирээд яагаад хорьж байгаа юм. Ямар шалтгаанаар хорьсон юм бэ гэж асуухад “чиний гэрийн хаяг тодорхойгүй байсан тул ингэж хорьсон” гэсэн тайлбарыг өгсөн. Тэгэхээр нь би “Би та нарт гэрийнхээ хаягийг тодорхой хэлж өгсөн ш дээ. Хэрвээ тэрхүү хаягийг маань нотлох шаардлагатай байсан бол гэрийнхэн рүү минь яриад ч юм уу? Эсвэл хамаатан садан руу минь яриад баталгаажуулж болох л байсан ш дээ” гэсэн. Тэгсэн чинь нээрээ тэгж болох байсан юм байна шүү. Жаахан эндүүрэл гарсан байна уучлаарай гэж хэлсэн. Мөн СБД-ийн шүүх намайг хууль бус жагсаал цуглаан хийсэн гэдэг үндэслэлээр буруутгаж 11000 төгрөгөөр торгох шийдвэрийг гаргасан.

-Та бүхэн үнэхээр хууль бус жагсаал хийсэн юм уу?

-Үгүй. СБД-ийн засаг даргын тамгын газарт жагсаал хийх хүсэлтээ албан ёсоор хүргүүлсэн. Мөн бид олон түмнийг хамарсан үймээн самуун тариагүй. Зүгээр л тайван жагсаал хийж, үзэл бодлоо илэрхийлсэн ш дээ. Тэгтэл ингэж дээрээс хавчин шахаж байна. Ер нь СБД-ийн цагдаа нар биднийг ямар шалтгаанаар цагдан хорьж, хашраах гэсэн даалгавартай байгаа юм шиг санагдсан. Гэрийн хаягаа тодорхой хэлсэн байхад аваачиж хоричихоод уучлаарай эндүүрэл гарчээ гэж хэлж болохгүй биз дээ.