Өнөөдөр СБД-ийн шүүхээс МУ-ын гуравдах Ерөнхийлөгч Н.Энхбаярыг ард түмний батлан даалтад гаргах хөдөлгөөний зохицуулагч З.Баянсэлэнгийг жагсаал цуглаан зохион байгуулсан хэргээр буруутгаж 14 хоног хорих ялаар шийтгэсэн. Тэрээр одоо Дэнжийн мянгын урьдчилан хорих төвд хоригдож байгаа юм. Үндсэн хуульд заасан эрхээ эдэлснийхээ төлөө хорих ялаар шийтгүүлсэн З.Баянсэлэнгэ шүүхийн шийдвэрийг эсэргүүцэж 4 сарын 22-оос эхлэн өлсгөлөн зарлах гэж  байгаа бөгөөд ард түмэндээ хандсан захидлыг илгээжээ. Уг захидлыг бүрэн эхээр нь хүргэж байна.

Миний бие Монгол Улсын гурав дахь Ерөнхийлөгч, МАХН-ын дарга Н.Энхбаярыг 2012 оны 4 сарын 13-ны үүрээр гэрээс нь хүч хэрэглэн, харгис хэрцгий аргаар хууль зөрчин баривчлагдсан явдалд нийт Монголчуудын нэгэн адил жигшин зэвүүцэж, харуусаж, эсэргүүцэж байгаа билээ.

Монголын ард иргэд ямар нийгэмд амьдарч байгаагаа ухаарах цаг нь болжээ. Хууль хэрэгжүүлэгч, хууль сахиулагч нар нь хуулийн тухай сайхан үлгэр ярьдаг боловч өөрсдөө хууль дээдлэх, хуулийнхаа утга учрыг ойлгодоггүй. Ойлгохыг ч хүсдэггүй нь улам бүр тодорхой болж байна. Хүнийг хүн ёсоор нь хайрлаж хүндлэх ёстой гэсэн Үндсэн хуулийнхаа заалтуудыг ч зөрчиж, хууль бус шийдвэр гаргаж түүнийг нь ард иргэд үг дуугүй сахин биелүүлэх ёстой гэж бидний толгойг угаах башир аргаа хэрэглэсээр л байна...

Өнөөдөр Монгол хүн эх нутагтаа эзний ёсоор амьдрах аргагүй болсны дээр үгээ хэлэх, үзэл бодлоо илэрхийлэх, эвлэлдэн нэгдэх, жагсаал цуглаан хийх, халдашгүй байх эрхүүд бодит байдал дээр устаж үгүй болсон байна.

Эрх баригчид өөрсдөө хуулиа хэр биелүүлдэг билээ?

7 сарын 1 – ний 5 хүний амь нас эрсэдсэн гэм буруутанг олж тогтоогоогүй, Оюу толгойн гэрээ, Таван толгойн орд газрыг гадныханд худалдсан, эх орноосоо урвасан, Монгол Улсын тусгаар тогтнол, Үндэсний Аюулгүй Байдалд ноцтой халдсан, МАН-АН-ийн олигархи мафи бүлгийн хэрээс хэтэрсэн үйл ажиллагааны золиос нь жирийн Монгол хүн гэж үү?

ҮГҮЙ ЭЭ!!! Та нарын 2008 оны сонгуулийн луйвар булхай, эрдэнэт таван хүний амь нас, ард түмний баялгийг хэдхэн хүн хувааж завшсан гэмт үйлдлийн хариуцлагыг Монголын ард түмэн илчлэн хүлээлгэх болно гэдэгт би итгэж байна.

Цөөхөн Монголчуудад ямар олон шорон, ямар олон хорих төв оногддог юм бэ? Шүүгчид, мөрдөн байцаагчидийн дургүй нь хүрсэн хүнээ айлгаж ичээдэг зэвсэг нь шорон болсон байна. Гэм буруутай эсэхийг нь ч тогтоогоогүй байж шууд шоронд хийдэг цаг өнөөдөр эргэн ирсэн байна.  Би модон тавцантай, төмөр ортой, шал нь битүү цементээр бүрсэн, чийг өмхий үнэртсэн, энд тэнд гав гинж, цоож цуурга дуугарсан, хүйтэн гэрэлгүй өрөөнд шударга үнэнийг дуудан хоригдож байна. Ард түмнийхээ сайн дураар зурсан гарын үсгийг авлаа гэж, тэдний саналыг сонслоо гэж хоригдож байна. Өнөөдөр олигархуудыг эсэргүүцсэн, төрийн буруутай хэргийг ярьсан, цугласан бүх хүнийг цаашид ч над шиг хорьсоор байх уу. Монголын шорон тийм зүйлд зориулагдан томорсоор байгаа юу.

Тэгэхээр хүний эрх, эрх чөлөөний төлөө бичигт өөрийн гарын үсгийг зурсан, өөрсдийн санал бодлыг хэн нэгэндээ ярихын тулд, үзэл бодлоо иэлрхийлхийн тулд тухайн нутаг дэвсгэрийн “ХААН” болсон засаг даргаас зөвшөөрөл авах ёстой болж байна бид. 

Ийм төр, ийм их хурлынгишүүд, ийм нийгэм бидэнд үйлчилж байна.

Би хүн бүхэн сайхан амьдраасай, хүүхэд бүхэн элэг бүтэн байгаасай, төр нь иргэдээ хүндэтгэдэг байгаасай, цагдаа нь нүдэндээ айдасгүйгээр үүргээ биелүүлдэг байгаасай, шударга ёс тогтоосой гэсэндээ тэмцсэн юм. Би хоригдохоос айхгүй, хэн нэгэн дарга, олигархид зусардаж зулгуйдахгүй. Ядарсан ард түмнийхээ үзэл бодлыг сонсож ирсэн, цаашид ч тэгэх болно. Сараалжин төмөр хаалганы цаана ч эрх чөлөө шударга ёс байх ёстой гэж би үүнийг бичиж байна.

Эрх баригч МАН-АН-ын олигархи бүлэглэл ардынхаа үгийг сонсож чадахгүй болсон юм бол биднийг дуугарахгүй болгох вакциныг сонгуулийн машинаасаа өмнө оруулж ирэх байж дээ!!! Би үргэлжлүүлэн тэмцэнэ. Үзэл бодлоо эндээс ч хэлнэ. Энд би зүгээр сууж чадахгүй ээ!

Эндхийнхэний ярьдаг хөц будаатай, амьтны ялгадастай хоолыг идээд хордож суухаар эрүүл чийрэг биеэрээ улс төрийн өлсгөлөн зарлахаар шийдсэнээ та бүхэндээ дуулгаж байна. Улс төрийн зорилгоор, МАН-АН-ын захиалгаар наранд, нарсанд хоригдож байгаа бүх хүний төлөө нийгэмд шударга ёсыг тогтоохын төлөө би өлсөх болно.

Би эмэгтэй хүн, эх хүн, сайн нөхрийн хань нь билээ. Хань гэснээс бусдын эхнэр шиг олж ирснийг нь чинь идчихээд, гэдсээ илээд, гэрт сууж чадаагүй намайгаа уучлаарай!!! Эх хүн үр хүүхдийнхээ сайн сайхан ирээдүйн төлөө үүнээс ч илүүг хийх ёстой гэсэн бодлыг минь бүү буруутгаарай.

Монголын нийт эмэгтэйчүүд, эхчүүд минь ээ !!! Үр хүүхэд, хойч ирээдүйнхээ төлөө хамгийн их санаа зовдог эмэгтэйчүүд бид тэмцэхгүй юм бол өөр хэн бидний хүүхэд, ирээдүйн төлөө тэмцэх юм бэ ? Та нар маань надтай хамт байгаарай. Тэгвэл би зоригтой байна.

2012 оны 4 сарын 22-ноос эхлэн З.Баянсэлэнгэ миний бие УИХ, Сүхбаатар дүүргийн шүүх-д дараах шаардлагуудыг тавьж өлсгөлөн зарлаж байна.

1.    Монгол улсын гурав дахь ерөнхийлөгч, МАХН-ын дарга Н.Энхбаярыг хууль бус баривчилсан үйлдлээ таслан зогсоо, сулла!

2.    Иргэн хүн бүр Үндсэн Хуулиас олгосон жагсаал цуглаан хийх эрхээ олигархуудын зөвшөөрлөөр эдэлдэггүй байх эрхийг баталгаажуулж, зөвшөөрөлгүй жагсаж цугласан гэдгээр яллаахаа боль!

3.    Намайг үндэслэлгүйгээр баривчилсан шүүхийг шийдвэрээ хүчингүй болгох!

4.    Хэн нэгнийг үзэл бодлоо илэрхийлснийх нь төлөө хавчин гадуурхаж, хорьж цагдаж, чагнаж, улс төрийн булай үйл ажиллагаандаа хууль шүүхийн байгууллагуудыг ашигладаг ХЗДХ-ийн сайд Нямдорж, УЕП Дорлигжавыг огцруул!

“Монгол Улсын Ерөнхийлөгч Н.Энхбаярыг ард түмний батлан даалтанд гаргая” хөдөлгөөний зохицуулагч З.Баянсэлэнгэ