24tsag.mn өнгөрсөн долоо хоногт Монголын урлагийн салбарт гарсан шинэ содон үйл явдлыг тоймлон хүргэж байна.
 

1.    Чингисийн хөшөө Английн нийслэл Лондон хотын төвд сүндэрлэсэн талаарх мэдээллээр энэ долоо хоногийн урлаг соёлын тоймоо эхлүүлж байна. Агуу их байлдан дагууллаараа дэлхийн түүхэнд бичигдсэн Монголын их хаан Чингисийн хөшөө Лондон хотын төвд  сүндэрлэсэн нь өнгөрсөн долоо хоногийн онцлох мэдээ байлаа. Буриадын барималч Даши Намдаковын энэхүү бүтээл ирэх есдүгээр сарыг хүртэл нийслэл хотын төвд орших Кумберлэнд хаалганы хажууд сүндэрлэх аж.
    2010 онд тус улсад болсон уран барилгын наадмын үеэр энэхүү баримлыг Лондонгийн олимпийг угтан босгох шийдвэрийг гаргажээ. Таван метрийн өндөртэй уг баримал нь дайнч тулаанч хааны дүр төрхийг илтгэхээсээ илүүтэйгээр их сэтгэгч, ухаантан хааны дүр төрхийг харуулахыг зорьсон гэж барималч Даши Намдаков тайлбарласан юм. Уг хөшөөг үзэхээр Лондонгийн тал бүрээс хүмүүс зорьж очиж байгаа гэнэ.  Монгол орны нүүдлийн соёл иргэншлийг тодотгосон дүр төрхийг энэхүү хөшөөнөөс харж болно хэмээн урлаг судлаачид болон түүхийн мэргэжилтнүүд дүгнэж байна.

2.    Сокe’n beat наадам өнгөрсөн долоо хоногт бүртгэлээ дуусгаад шалгаруулалтаа эхлүүллээ. “Зөвхөн амьд” гэсэн уриатай шинэ залуу дуучдыг дэмжих, үзэгчдэд амьд хөгжмийн гайхамшгийг мэдрүүлэх зорилготой “Coke’n beat” наадмыг 2007 оноос эхлэн зохион байгуулсаар ирсэн.
    Олон шатны шалгаруулалтаас тунаж үлдсэн шилдгийн шилдэг хамтлаг, дуучид долдугаар сарын 14-нд тодрох бөгөөд шалгарсан хамтлаг эх орноо төлөөлөн “Asian beat” наадамд оролцох эрх авах юм.
Тус наадмын 2007 оны шилдгээр  “Булсара” хамтлаг, 2008 онд “Зүгээр л” хамтлаг, 2009 онд “The Lemons”, 2010 онд “L-Guards”, 2011 онд “The Compass” хамтлагууд шалгарч,  “Asian beat” наадамд өрсөлдөж байсан билээ. Харин энэ жил ямар хамтлаг, дуучин ялагч болохыг хүлээх л үлдлээ.

3.    Шинэ киноны нээлт: “Монгол кино” групп, ӨМӨЗО-ны “Нүүдэл соёл” кино компанитай хамтран бүтээсэн “Аравт” түүхэн уран сайхны киноны нээлт өчигдөр болж өнгөрлөө. "Аравт” киноны зохиолыг “Монгол фильм” группын уран бүтээлч Н.Эрдэнэ бичиж, найруулагчаар нь Ч.Ганзориг ажиллажээ. Дэлхийг эзэлсэн Чингис хааны цэргийн аравт, зуутын зохион байгуулалт, их Монгол Улсын хаадын мэргэн, холч ухаан бодлыг хэрэгжүүлэхэд нэгэн сэтгэлээр зүтгэж явсан эгэл жирийн баатарлаг цэргүүдийн тухай тус кинонд өгүүлэх гэнэ. Тус киноны хөгжим хэдийнэ үзэгч, сонсогчдын чихэнд хоногшсон биз ээ. Киноны хөгжмийг төгөлдөр хуурч Б.Чинбат бичиж, хоёр ч клипээ үзэгчдийн хүртээл болгоод амжсан юм.
    Кинонд Найман зууны тэртээх Чингис хааны дэлхийг байлдан дагуулахад гол судас, үндсэн хөшүүрэг  болсон эгэл жирийн цэрэг эрс хэрхэн амьдарч тэмцэж, хооллож ундалж, хоорондоо нөхөрлөж, аяны хүнд, дайны бэрхийг хэрхэн даван туулж, хатуу бэрхийг сөрсөн цэрэг эрс тулааны талбарт эрсдэн унахдаа ижий аав, эх нутаг, эхнэр хүүхдээ хэрхэн санан дурсаж, шаналан гашуудаж байсныг харуулжээ. Бид “Аравт” киноны талаар дэлгэрүүлэн хүргэх болно.

4.    Туркийн радио монгол хэл дээр нэвтрүүлгээ цацах болсон нь өнгөрсөн долоо хоногт гарсан бас нэгэн таатай мэдээлэл байлаа.
    Туркийн үндэсний радиогийн “Туркийн дуу хоолой” нэвтрүүлэг тун удахгүй монгол хэл дээр цацагдаж эхлэх аж. “Бид БНСУ, Монгол, Японоос хүсэлт хүлээж авсан. Үүний дагуу монгол хэл дээр нэвтрүүлгээ цацах гэж байна” гэж тус радиогийн Гадаад харилцааны албаны дарга өгүүлжээ. Монгол тэдний нэвтрүүлгээ цацдаг 36 орон болж байгаа юм байна. Тус радио нь гадаадын 35 хэл дээр нэвтрүүлгээ цацдаг бөгөөд үүгээрээ дэлхийн хамгийн том радио станцын дөрөвдүгээрт ордог юм.

5.    Өнгөрсөн долоо хоногт борлуулалтаараа тэргүүлсэн 10 цомгийн талаарх мэдээллийг “Hi-Fi Records”-ын хөгжмийн сүлжээ гаргажээ.  Энэ долоо хоногт “A Sound” хамтлагийн “Зуун наст” цомог борлуулалтаараа тэргүүлсэн байна. Тус цомог нь гурван долоо хоногийн турш борлуулалтаараа тэргүүлж байгаа билээ.

7.    Дуурийнхан улаан хивсний ёслол хийхээр болсноо мэдэглээ. Өнгөрсөн сард драмын театрынхан болон хошин урлагийнхан улаан хивсний ёслол хийж үзэгчдийг үзэх харах зүйлтэй байлгасан бол энэ удаад дуурийнхан улаан хивсний ёслол хийхээр болжээ. Улсын дуурь, бүжгийн эрдмийн театрын гоцлол дууны ангийн 60 жилийн ой энэ жил тохиож байгаа билээ. Ойн хүрээнд “Viva l’opera” тоглолтыг энэ сарын 27-нд УДБЭТ-т тоглох гэж байгаа бөгөөд хүндэтгэлийн тоглолт улаан хивсний ёслолоор эхлэх гэнэ. Тус арга хэмжээнд П.И.Чайковскийн нэрэмжит олон улсын уралдааны мөнгөн медальт, МУГЖ, Э.Амартүвшин,  М.Глинкийн нэрэмжит олон улсын уралдааны нэгдүгээр байрын шагналт С.Мөнгөнцэцэг зэрэг олон улсын уралдаанд амжилттай оролцсон дуучдаас эхлээд энэ цагийн шилдэг гоцлоочид оролцох гэнэ.