Шилжилт: “Айванхоу майнз”-ын Оюутолгой “Рио Тинто”-гийнх болов
Канадын “Рио Тинто” компани нутаг нэгт “Айванхоу Майнз”-ын 57 хувийг худалдан авснаар “Оюу толгой” төслийг эзэмших компани цаагуураа өөрчлөгдлөө. Гэхдээ энэ бүхэн хэвийн үзэгдэл гэдгийг төслий захирал Камерон Макрэй мэдэгдсэн юм. Энд гарах ганц өөрчлөлт нь “Айванхоу Майнз”-аас ТУЗ-д байсан хоёр гишүүний оронд “Рио Тинто”-гийн төлөөлөл орох аж. Төслийнхөө талаар ноён Макрэй 2018, 2019 он гэхэд "Оюу толгой" дэлхийд эхний гуравт орох том уурхай болно. 2013 онд 500 сая тонн зэсийн баяжмал үйлдвэрлэх тооцоо гарчээ.
Ялалт: Матад сумын газрыг 1.3 тэрбумаар нөхөн сэргээнэ
Мягмар гаригийн шөнө дунд Баянзүрх дүүргийн шүүхээс монгол улсад анх удаа гэж болохуйц ач холбогдолтой шийдвэр гаргажээ. Дорнод аймгийн Матад сумын Тамсагийн нутагт ажилладаг “Петрочайна Дачин Тамсаг” компани байгаль орчныг ихээр бохирдуулсны төлөө 1.3 тэрбум төгрөг нөхөн төлөхөөр боллоо. Уг мөнгий орон нутгийг хөгжүүлэх санд оруулах ёстой юм. Тэд энэ мөнгийг төлөх болсон шалтгаан нь 1130 га газрыг талхалсны төлөөх шийдвэр байлаа. Мэргэжилтнүүд энэ явдлыг Монголд жишиг тогтоох анхны явдал гэцгээв.
Шалгалт: Нүүрс тээвэрлэгч 13 компанийг сайд шалгав
Нийгмийн хамгаалал хөдөлмөрийн сайдын тушаал ёсоор Өмнөговь аймгийн Шивээхүрэн, Гашуусухайт боомтоор нүүрс тээвэрлэж байгаа 13 аж ахуйн нэгжийг шалгалаа. Ингэснээр гадаад иргэнээр нүүрс тээвэрлүүлж буй компанийг мэргэжлийн байгууллагууд нарийвчлан шалгах, хөдөлмөрийн аюулгүй байдлын талаар дүгнэлт гаргах нь зүйтэй гэсэн шийдэлд хүрсэн. Мөн хууль зөрчвөл хариуцлагыг нь өндөрсгөх, Оюутолгой, Тавантолгойн хүнд даацын жолоочийг тусгайлан сургах нь зүйтэй гэж Т.Ганди сайд үзлээ.
Огцролт: Роберт Фрийдланд ажлаасаа халагдлаа
Түүний тэргүүлж байсан “Айванхоу майнз” компаний хөрөнгө оруулагч нь “Рио Тинто” юм. Ноён Фрийдланд хөрөнгө оруулагч талтайгаа тохиролцоонд хүрч чадаагүй учраас ажлаасаа халагдав. Энэ он гарахаас өмнөхөн “Рио Тинто” Фрийдландын компанид эзэмших хувиа 51 хувь болгож байсан бол одоо ийнхүү даргыг нь огцруулж чадлаа. Гэхдээ зөвхөн Фрийдланд биш түүний хамт зургаан захирал нь ажлаа хүлээлгэн өгсөн байна. Ингэснээр ТУЗ-ийн дийлэнхийг хараат бус гишүүд бүрдүүлж байгаа юм.
Үзэсгэлэн: Уул уурхайн бүх салбарынхан нэг дор цуглалаа
Дэлхийн 15 улс орны төлөөлөл компаниуд оролцсон “Монгол уул уурхай 2012” олон улсын үзэсгэлэн яг одоо болж байна. Энэ сарын 20, 21-нд хоёр өдөр зохион байгуулагдах үзэсгэлэнд нөхөн сэргээлт, санхүү, даатгал, программ хангамж, тэсэлгээ, хөдөлмөр хамгаалал гээд бүхий л төрлийн компани оролцож байгаа юм. Нийтдээ 80 гаруй компани оролцож байгаа бөгөөд үйл ажиллагаагаа танилцуулан илтгэл тавьж байна. /24tsag.mn/
