Буриадын уран барималч Даши Намдаковыни бүтээсэн Чингис хааны хөшөө Лондон хотын Марбле нуман хаалганы ойролцоо сүндэрлээд удаагүй байгаа билээ. Хөшөөний нээлтийн ёслолд БСШУ-ны сайд Ё.Отгонбаяр тэргүүтэй Монголын төлөөлөгчид болон Англид амьдардаг монголчууд оролцсон юм. Гэсэн ч Лондон хотод байрласан энэ хөшөөг зарим англичууд ад үзэх болжээ. Энэ нь бүр Английн парламентийн хэмжээнд маргаан үүсгэсэн байна. Уг нь Чингис хааны хөшөөг Олимп болон Паралимпын тоглолтыг угтан Лондон хотын хөшөөний фестивалд зориулж авчирсан аж.

   Английн Ажилчдын намын тэргүүн Паул Димолденберг “Олон зуун хүнийг үхэлд хүргэж, геноцид үйлдсэн эзлэн түрэмгийлэгчийн хөшөөг яагаад Лондон хотын зүрхэнд байрлуулж байгаа юм бэ?” гэж шүүмжилсэн тухай thisislondon.co.uk сайтад бичсэн байна. Тэрбээр парламентийн танхимд “Марблийн нуман хаалганы урд Чингис хааны хөшөөг байрлуулна гэдэг хачин, утгагүй шийдвэр болсон. Английн парламент болон Лондон хоттой холбоотой маш олон агуу хүн байдаг. Консерватив намын консул яагаад заавал эзлэн түрэмгийлэгчийн хөшөөг энд байрлуулсан юм бэ? Дараа нь Сталин, Пол Пот, Саддам Хуссений хөшөөг авчрах уу?” гэж ихэд бухимдсан байна.

 Ажилчдын намын тэргүүн Паул Димолденберг Чингис хааны оронд Марбле нуман хаалганы ойролцоо амьдарч байсан түүхэн баатар Гаая Гибсоны хөшөөг санал болгосон байна. Мөн энэ газраас холгүй Сант Мэригийн эмнэлэгт ажиллаж байхдаа пенцилин нээсэн Александр Фелимингийн хөшөөг ч байрлуулж болох тухай хэлжээ.

   Харин Английн парламентийн дарга Роберт Дэвис “Урлагийн бүтээл ямар нэг санааг илэрхийлж, тэр нь хүмүүсийн дунд хэлэлцүүлэг өрнөх сэдэв болох үедээ алдартай болдог. Чингис хааны хөшөө бол сайн бүтээл” гээд Чингис хааныг түүхэнд бүтээсэн гавьяаг дурдсан байна.

  Даши Намдаковын бүтээсэн 1,5 метр өндөртэй энэ хөшөөг фестивал дууссаны параа "Halcyon" галлерейд байрлуулах юм байна. Харин Чингис хааны хөшөөг ад үзэж байгааг дуулсан Лондон дахь монголчууд энэ хөшөөг фестиваль дууссаны дараа Монголд авчрах тухай ярих болжээ. Улаанбаатар хотын Сүхбаатарын талбай, Чингис хааны мэндэлсэн Дэлүүн болдог гээд дээрх хөшөөг байрлуулах газар Монголд мундахгүй олон билээ.