УИХ-ын гишүүн Х.Баттулгыг ард иргэд тун шударга эх оронч гэж ойлгож ирсэн. Өөрөө ч ийм имиж бүрдүүлэх талаар багагүй ажилласан. Гэвч энэхүү шударга имижийнх нь цаана эх орноо худалдаж хөлжсөн үнэн дүр төрх нь илэрч эхэллээ.
    УИХ-ын гишүүн Х.Баттулгыг ард иргэд тун шударга эх оронч гэж ойлгож ирсэн. Өөрөө ч ийм имиж бүрдүүлэх талаар багагүй ажилласан. Гэвч энэхүү шударга имижийнх нь цаана эх орноо худалдаж хөлжсөн үнэн дүр төрх нь илэрч эхэллээ. Тэрбээр Ж.Оджаргалын тэргүүлдэг “Эм-Си-Эс” группийг стратегийн орд газар болох Ухаа худгийг Хятадуудад худалдсан, “Эм-Си-Эс”-ийн 75 хувийг хятадууд эзэмшдэг гэх мэт мэдэгдлүүд хийж байсан нь хэвлэлийн хуудаснаа үлджээ. Түүний энэ мэдэгдлийг сонссон зарим хүмүүс эх оронч гэдэг бол нөгөө хэсэг нь Х.Баттулга Ухаа худаг төсөлд оролцож чадаагүйдаа атаархдаг гэж ярьдаг. Ямар ч байсан стратегийн орд газрыг хятадуудад зарлаа гэж бизнес эрхэлж яваа нөхдөө матаад байгаа Х.Баттулга өөрөө бас стратегийн орд газрыг адилхан худалдсан тухай мэдээлэл тархаж эхэллээ.

    УИХ-ын эрхэм гишүүн маань Төв аймгийн Баян сумын нутаг дахь Төгрөг нуурын ордыг Хонконгийн хятадуудад зарах эх суурийг тавьжээ. Төгрөг нуурын орд газар нь Х.Баттулгын “Женко” группээр дамжин “Камекс”, “Төгрөг нуурын энержи” гэх мэт компаниудаар дамжин Хонконгийн “Mongolian investment group”-ийн мэдэлд очжээ. Ийнхүү олон компани дамжсан Төгрөг нуурын орд газрын загалмайлсан эцгээр УИХ-ын гишүүн Х.Баттулга тодорлоо.

    Стратегийн орд газруудын хоёр дахь жагсаалтыг УИХ-ын 27-р тогтоолоор баталсан байдаг. Уг жагсаалтыг Төв аймгийн Баян сумын нутаг дахь Төгрөг нуурын хүрэн нүүрсний орд тэргүүлдэг аж. Мөн энэ ордыг Засгийн газраас нууцын зэрэглэлтэй стратегийн ордод багтааж байсан гэж эх сурвалж мэдээллээ. Гэхдээ манай улсад нууцын зэрэглэлтэй стратегийн орд байдаг эсэхийг сонсч байсангүй. Хамгийн гол нь Төгрөг нуурын орд нийслэл Улаанбаатараас 130 орчим км-ийн зайтай, төвийн бүсийн таван том ордын нэг, Багануур, Шивээ-Овоогийн нөөц дуусвал гол үүц газар болно. Мөн тавдугаар цахилгаан станцад эрчим хүчний нөөц шаардлагтай зэрэг олон шалтгааны үүднээс энэ ордыг чухалчилж стратегийн ордод оруулсан байж болох юм. Уг ордыг 13 тэрбум тонн хүрэн нүүрсний нөөцтэй гэсэн таамгыг социализмын үеийн геологичид гаргажээ. Гэвч одоог болтол нөөцийнх нь талаар зөрүүтэй мэдээллүүд байдаг юм.

    Х.Баттулгын асуудал үүсгэж “амлаж авсан” Таван толгойн орд газар Зүүн цанхи, Баруун цанхи, Ухаа худаг гэх мэт олон хэсгээс бүрддэг шиг Төгрөг нуурын орд газар Тахилт-1, Тахилт-2, Цахир, Цайдам, Төгрөг, Довцог гэсэн олон хэсгээс бүрддэг аж. Эдгээр орд газрыг “Төгрөг нуурын энержи” компани MV-000228, MV-013533, MV-013553, MV-015429 гэсэн тоот ашиглалтын лицензээр эзэмшдэг аж. Уг лицензүүд “Төгрөг нуурын энержи” компаниар дамжин толгой компани болох “Mongolian investment group”-ийн нэрээр Хонгонкийн хөрөнгийн биржид гарчээ. Тэгээд Хонконгийн хөрөнгийн биржээс 225 сая доллар босгосон бололтой.
 
    Одоогоос нэлээд хэдэн сарын өмнө Х.Баттулга Хонгонкийн хөрөнгийн бирж дээр IPO хийгээд Ж.Оджаргал шиг мөнгө босгож чадаагүйдээ бухимдалтай байгаа гэж эх сурвалжууд мэдээлж байсан нь ортой боллоо. Ж.Оджаргал Ухаа худгийн төслөө “Mongolian Mining Corp”-ийн нэрээр Хонгонкийн хөрөнгийн бирж дээр гаргаж 650 сая доллар босгож байсан юм.

    Ийнхүү УИХ-ын хамгийн эх оронч тодотголтой нэгний гараар Улаанбаатарыг ирээдүйд гэрэлтэй, цахилгаантай, хөгжилтэй байлгахаар төсөөлөгдөж үүцэнд байсан орд газар Хонконгийн хятадуудын мэдэлд очжээ. Удахгүй Х.Баттулга гишүүнийг энэ асуудлаар тайлбар, мэдээлэл хийнэ гэдэгт итгэж байна.