Өнөөдөр 11.00 цагаас Монгол улсын Дээд шүүхэд МАН, АН-ыг татан буулгуулах өргөдлийг иргэн Г.Доёд өгчээ.
    Өнөөдөр 11.00 цагаас Монгол улсын Дээд шүүхэд МАН, АН-ыг татан буулгуулах өргөдлийг иргэн Г.Доёд өгчээ. Тус өргөдлийг Улсын дээд шүүхийн Иргэний тэнхимийн тэргүүний туслах Н.Ундраа хүлээн аваад ажлын таван өдөрт багтаан таны өргөдлийн хариуг өгөх болно гэдгээ мэдэгдсэн байна. Иргэн Г.Доёдын Улсын дээд шүүхэд өгсөн өргөдлийг бүрэн эхээр нь хүргэж байна.




    Монгол Улсын Үндсэн хууль, Улс төрийн намуудын тухай болон УИХ-ын Сонгуулийн тухай хуулиудыг удаа дараа зөрчсөн Монгол Ардын Нам, Ардчилсан Намуудыг хуулийн дагуу татан буулгаж, Улсын Дээд Шүүхийн бүртгэлээс хасч өгөх хүсэлтийг дараах үндэслэлээр гаргаж байна.Үүнд:

Нэг. Төрийн эрх мэдлийг ямарч хамаагүй хууль бус аргаар авах зорилгоор сонгогчдын саналыг татахын тулд Ардчилсан Нам хүн бүрд нэг сая төгрөг,Монгол Ардын Нам нэг сая таван зуун мянган төгрөг тус тус үндэслэлгүйгээр амласны дээр Монгол Ардын Нам Алдарт эх-2 одонтой эхэд 500 мянган төгрөг,Алдарт эх-1 одонтой эхэд 1 сая төгрөгийн тэтгэмжийг жил бүр олгоно ,тэтгэвэр ,тэтгэмжийг 2012 он гэхэд 2008 оныхоос гурав дахин нэмэгдүүлнэ гэхчилэн хуурч мэхэлсэн,

Хоёр. Монгол Ардын Нам, Ардчилсан Намууд нь 2008 оны УИХ-ын сонгуулиар төрийн эрхиийг хууль бус, хүчирхийллээр авч, үр дүнд нь таван хүн алуулж,олон зууниргэд эрүүл мэндээрээ хохирч, үүнийг нуун дарагдуулах зорилгоор хамтарсан Засгийн газар байгуулсан;

Гурав. Улс орны эрх ашигт үл нийцэх ашигт малтмалын хуулиар их хэмжээний газар нутгийг гадаадынханд  лиценз нэрээр олгож улс орны тусгаар тогтнол, нутаг дэвсгэрийн бүрэн бүтэн байдлын эсрэг үйл ажиллагаа, явуулсан.  Үндэсний эдийн засагт онцгой чухал стратегийн ордуудыг эх орон, ард түмэнд хохиролтойгоор гэрээлснээ ашигтай мэтээр хуурамчаар сурталчилгаа явуулсан;

Дөрөв. Ардчилсан Нам хамтарсан засгийн газраас гарахдаа бид намын эрх ашгийг үүднээс гарч байна гэж үндэслэсэн нь энэ нам хамтарсан Засгийн газарт орохдоо тунхаглаж байсан үндэсний эрх ашгаас урвасан;
Эдгээр үйлдлүүдийн уршгаар Хэнээс ч үл хамаарах,хараат бус сонгогчдын чөлөөтэй сонгох эрхийг эрээ цээргүй зөрчиж сонгогч-иргэдэд хандсан- дарамтлах, хүч хэрэглэх, хуурч мэхлэх, эд мөнгөөр татах, мөнгө болон албан тушаал амлах, санал худалдаж авах,саналын хуудсыг зориудаар буруу тоолох зэрэг хуулиар хориглосон үйлдлүүд нь сонгуулиас сонгуульд  хуулийн хариуцлага хүлээхгүйгээр хүрээгээ тэлж,улам лавшрах боллоо.
Ийм байдал нь Монгол улсын тусгаар тогтнол,бүрэн эрх эрхт байдлыг ноцтой эрсдэлд хүргэж ,хууль дээдлэх Үндсэн хуулийн зарчим алдагдаж байгааг хуулийн дагуу даруй таслан зогсоох шаардлагатай гэж үзэж байна.

Зөрчигдсөн хуулиудын заалтуудыг дурдвал:

           Монгол Улсын Үндсэн хуулийн МОНГОЛ УЛСЫН БҮРЭН ЭРХТ БАЙДАЛ –ын тухай Нэг дүгээр бүлгийн
Нэгдүгээр зүйлийн 2-т. “ Ардчилсан ёс, шударга ёс, эрх чөлөө, тэгш байдал, үндэсний эв нэгдлийг хангах, хууль дээдлэх нь төрийн үйл ажиллагааны үндсэн зарчим мөн.”,
Гуравдугаар зүйлийн 2-т “Төрийн эрх мэдлийг хууль бусаар авах, авахаар завдахыг хориглоно.”,
Зургадугаар зүйлийн 1-д“Монгол Улсад газар, түүний хэвлий, ой, ус, амьтан, ургамал болон байгалийн бусад баялаг гагцхүү ард түмний мэдэл, төрийн хамгаалалтад байна.”
Монгол Улсын УИХ-ын сонгуулийн тухай хуулийн
6 дугаар зүйл.Монгол Улсын иргэний сонгуулийн эрх  
37.11.18.сонгогчдын санал худалдан авахад чиглэсэн бусад аливаа үйлдэл, үйл ажиллагаа явуулахыг хориглох
55.1.Сонгуулийн хууль тогтоомж зөрчсөн үйлдэл, эс үйлдэхүй нь гэмт хэргийн бүрэлдэхүүнтэй бол гэм буруутай этгээдэд Эрүүгийн хуульд заасан хариуцлага хүлээлгэнэ.гэх
Эдгээр хуулиудын заалтууд зөрчигдсөн байна.
Иймд Улс төрийн намуудын тухай хуулийн 23.2-т заасан“Монгол Улсын бүрэн эрхт байдал, тусгаар тогтнолыг бусниулах, үндэсний эв нэгдлийг задлан бутаргах, Yндсэн хуулийн бус аргаар төрийн эрхийг авах, хүч түрэмгийлэх, яс, үндэс, арьсны өнгөөр ялгаварлан гадуурхах, бусад орны тусгаар тогтнол, нутаг дэвсгэрийн бүрэн бүтэн байдлын эсрэг үйл ажиллагаа, сурталчилгаа явуулсан буюу шашны, цэргийн болон цэрэгжсэн, фашист намын хэлбэрт шилжсэн бол Улсын дээд шүүх намыг тараах тухай шийдвэр гаргаж, уг намыг энэ хуулийн 23.1-д заасан тав хоногийн хугацаанд улсын бүртгэлээс хасч, нийтэд мэдээлнэ” гэснийг журамлан Монгол Ардын Нам, Ардчилсан намуудыг татан  буулгаж, улсын бүртгэлээс хасч өгнө үү” гэжээ.