ОХУ-ын Уралын холбооны их сургуульд суралцдаг гурван монгол оюутан хар тамхи хэрэглэсэн хэргээр арваад хоногийн турш хоригдоод байгаа билээ. Тиймээс монгол оюутнууд мужийн депутат Георгий Перскийд хандан тусламж хүсчээ.

Учир нь Георгий Перский өмнө нь ийм үйл явдалтай таарч байсан бөгөөд түүний эхний шинжилгээний хариу хар тамхи хэрэглэсэн гэж гарсан ч давтан шинжилгээгээр нотлогдоогүй учир эмнэлгийнхэн түүнээс уучлал гуйж байсан байна. Монгол оюутнуудад тохиолдсон шиг явдал Г.Перскийг нэлээд цочирдуулсан учраас тэдний хүсэлтийг нааштай хүлээж авна гэж оюутнууд үзжээ. Депутатын өмгөөлөгч шүүхэд гомдол гаргахад оюутнуудад тусалсан байна. Энэхүү гомдлыг шүүх ойрын үед авч хэлэлцэх ажээ. Харин оюутнуудыг баривчлагдсан үеэс эхлэн ангийнхан нь хүний эрхийн бүрэн эрхт төлөөлөгч Татьяна Мерзляковад захидал бичсэний үр дүнд тэдэнтэй уулзуулж чаджээ. Татьяна Мерзлякова сэтгүүлчдэд ярихдаа “Оюутнууд буруугүй гэдгээ илэрхийлэн уйлцгаасан. Тэд хар тамхичидтай үнэн дээ адилгүй юм билээ. Хар тамхитай эвлэршгүй тэмцэл явуулах ёстой гэдэгтэй би санал нийлдэг. Гэвч мансууруулах бодис хэрэглэсэн нь тодорхой оношоор батлагдсан тохиолдолд хатуу арга хэмжээ авах хэрэгтэй. Харин монгол оюутнуудын хувьд эхний шинжилгээний хариу сэжигтэй гарсан ч хоёр дахь шинжилгээгээр хар тамхины ямар ч ул мөр олдоогүй.

Түүнчлэн Уралын холбооны их сургуулийн ректор Виктор Кокшаров эдгээр оюутныг ямар ч зөрчил дутагдал гар гаж байгаагүй шилдэг оюутнууд болохыг баталсан. Бид ар гэрийнхэнтэй нь холбоо барихыг хичээж байна. Шүүхээс давж заалдах гомдлыг авч хэлэлцээд оюутнуудыг цагаатгавал Екатеринбургэд үргэлжлүүлэн суралцана” гэжээ.
Түүний хэлснээр оюутнууд буруу оношоос болж хэрэгт холбогдсон байж болзошгүй гэнэ. Өөрөөр хэлбэл, мужийн Наркологийн төвд мансууруулах бодис хэрэглэсэн эсэхийг тогтоох шинэ тоног төхөөрөмж суурилуулж байгаа бөгөөд ойрын хугацаанд ажил нь цэгцэрч дуусах аж. Тиймээс хар тамхи хэрэглэсэн гэгдээд байгаа гурван монгол оюутныг давтан шинжилгээнд оруулснаар энэ хэрэг цааш үргэлжлэх эсэх нь шийдэгдэх аж.