Сүүлийн үед АТГ-ынхан тул барих гэж хичээж байна. Тиймээс л Ерөнхийлөгч байсан хүнээ сүр дуулиантайгаар “аавынд” аваачаад хийчихлээ. Асуудал хүрээгээ авч “жинхэнээрээ” Н.Энхбаярыг үндэсний удирдагч болгох хэмжээнд хүргэв. “Жинхэнээрээ” гэдэг нь түүнийг Ерөнхий сайд байхад үндэсний удирдагч гэж өргөмжлөөд олон нийтийн дунд ихээхэн сөрөг имижийг бүрдүүлсэн юм. Сүүлийн үед Н.Энхбаярын рейтинг өсч, тойрон хүрээлэгчид, гишүүд дэмжигчид ч нэмэгдлээ. Хамгийн сүүлд хийсэн “Сантмарал” сангийн судалгаагаар МАХН-ын рейтинг 12.1 хувьд хүрэв. Ийнхүү өндөрөө авсан энэ намд МАН-аас Ч.Улаан, О.Чулуунбат, Д.Тэрбишдагва гурав орох нь тодорхой болсон гэж эх сурвалжууд мэдээлж байгаа. Эдгээр эрхэмүүд ч уугуул намаа сэргээх талаар ил, цагаан зарлаж байгаа. 14 хоногийн өмнө болсон бүлгийн хурал дээр МАН-ын нөлөө бүхий эрхэм С.Баяр “Манай туршлагатай улс төрч Ч.Улаан уугуул намаа сэргээнэ гэж яриад байгааг ойлгохгүй байна. Бид чинь уугуул нэрээ л авсан биз дээ” гэж улаан нүүрэн дээр нь улалзуулсан гэдэг.

Ч.Улаан тэргүүтэй улс төрчдийг МАН-аас гарна гэдэгтэй холбогдуулан нэг хачирхалтай мэдээлэл газар авч эхэлжээ. Ч.Улаан гишүүнийг өмнө нь гаалийн гэх тодотголтой Х.Баатарын хэрэгт холбогдуулан шалгаж байсан бололтой. Уг хэргийг нь сэргээн шалгаж, эрүү үүсгэх тухай яриа олон хүний ам дамжин яригдаж байна. Хэрэв энэ үнэн бол түүнд намаа хагалан бутаргаж гарвал Н.Энхбаярын араас явуулна шүү гэсэн дохио ч байж мэднэ. Эсвэл зүгээр л хэн нэгэн хоржоонтой хүмүүсийн тарааж байгаа ямар ч утгагүй цуу яриа байж болно.

Уг нь Н.Энхбаяр хоригдохоосоо өмнө телевизэд яриа өгөхдөө “МАХН-ын бүлэг парламентад удахгүй байгуулагдана” гэж хэлсэн учиртай үг бий. Хуулиар бол наймаас дээш гишүүн байж бүлэг болдог. Тэгэхээр Н.Энхбаярыг хоригдохоос өмнө наймаас илүү хүн МАХН-д нэгэн зэрэг элсэхээр бэлтгэгдэж байсан бололтой. Харин энэ төлөвлөгөө одоо бараг хэрэгжих боломжгүй болсон. Учир нь МАН-ын дарга С.Батболд, Ерөнхий нарийн бичгийн дарга У.Хүрэлсүх хоёр Н.Энхбаярын намд сээтэн хаяад байгаа гишүүддээ сануулга өгч “аюулгүй” болгосон гэдэг.
 
Мөн Н.Энхбаярыг үргэлжлүүлэн хоривол МАХН-ыг Ч.Улаан удирдаж сонгуульд орохоор ярилцсан ч байж мэднэ. Тиймээс л Ч.Улаан МАХН-ын дарга болно гэсэн яриаг ч бас гаргаад амжжээ. МАН-ын туршлагатай улс төрч, Сангийн сайдаар олон удаа ажилласан Ч.Улааны тухай иймэрхүү хачирхалтай яриа улс төрийн нэмэр хачир болон хүрээгээ тэлж байна. Тэрээр энэ бүх цуу ярианд цэг тавьж тайлбар өгөх болов уу? Эсвэл үнэхээр олны яриа ортой болж олон жилийн өмнөх гаалийн Х.Баатарын хэргээр дахин шалгагдах уу гэдгийг цаг хугацаа л харуулах биз дээ.