Бүгд Найрамдах Индонез Улсын Жакарта хотноо болж буй “Ирээдүйг цогцлоох эмэгтэйчүүдийн зөн” сэдэвт Олон Улсын хуралд Улсын Их Хурлын гишүүн Л.Эрдэнэчимэг илтгэгчээр оролцлоо.

Мөн тэрээр Бүгд Найрамдах Индонез Улсын Ардын Төлөөлөгчдийн танхимын гишүүн, Парламент хоорондын хамтын ажиллагааны асуудал эрхэлсэн хорооны дарга хатагтай Нурхаяти Али Ассагафтай Ардын Төлөөлөгчдийн оронд уулзсан байна. Уулзалтын үеэр Улсын Их Хурлын гишүүн Л.Эрдэнэчимэг хэлэхдээ, “Хоёр улсын хооронд дипломат харилцаа тогтоосны 59 жилийн ой энэ онд тохиож байна. Монгол Улс, Бүгд Найрамдах Индонез Улс олон жилийн найрсаг харилцаатай явж ирсэн бөгөөд бидэнд цаашид хийж хэрэгжүүлэх ажлууд багагүй байна. Ялангуяа хоёр орны парламент хоорондын хамтын ажиллагааг идэвхжүүлэх, харилцан туршлага солилцох, хоёр талын айлчлалуудыг зохион байгуулах ажлыг Улсын Их Хурлын гишүүний хувьд дэмжиж ажиллах болно. Эмэгтэй улс төрчид шийдвэр гаргах түвшинд 20 биш 30, цаашлаад 40 хувь хүртэл өсөх шаардлагатай байгаа талаар Олон Улсын эмэгтэйчүүдийн хуралд тавигдсан илтгэлтэй санал нийлж байгаа. Хэдийгээр эмэгтэйчүүдийн түгээмэл эрхийг хамгаалсан багагүй хууль, дүрэм улс орнуудад үйлчилж байгаа ч хууль тогтоох түвшний эмэгтэйчүүдийн оролцоо хувь хангалтгүйгээс бидэнд шийдүүлэх ёстой асуудлаа шийдвэрлүүлэх хүч дутах, улс төрд бэлтгэгдсэн эмэгтэйчүүдээ сонгуулийн санхүүгийн дарамт, босго өндөр байгаагаас нэр дэвшүүлж чадахгүй байгаа зэрэг асуудлууд нийтлэг тулгарч байна. Энэ чиглэлээр бид Индонезийн парламентч эмэгтэйчүүдтэй цаашид нягт хамтран ажиллах болно. Хоёр орны хууль тогтоох байгууллагын хамтын ажиллагааг нэмэгдүүлэх чиглэлээр та бүхэн манай Элчин сайдын яамтай хамтарч ажиллаж байгаад баяртай байна” гэлээ.

Бүгд Найрамдах Индонез Улсын Ардын Төлөөлөгчдийн танхимын гишүүн, Парламент хоорондын хамтын ажиллагааны асуудал эрхэлсэн хорооны дарга хатагтай Нурхаяти Али Ассагаф, “Цаашид бид илүү их хамтарч ажиллах болно гэдэгт итгэлтэй байна. Энэхүү хамтын ажиллагааг өргөжүүлэн хөгжүүлэхэд Жакартад суугаа Монгол Улсын Элчин сайдын яам, хатагтай Ш.Батцэцэгийн хичээл зүтгэл ихээхэн хувь нэмэр болно. Бид одоо хоёр орны парламент хоорондын хамтын ажиллагааны санамж бичгийн төсөл дээр ажиллаж байгаа бөгөөд удахгүй ажил хэрэг болгох зорилт тавин ажиллаж байна гэлээ. Уулзалтад Монгол Улсаас Бүгд Найрамдах Индонези Улсад суугаа Онц бөгөөд Бүрэн эрхт Элчин сайд Ш.Батцэцэг оролцлоо.