Өчигдөр “Сайдын цаг” уулзалтад Аж үйлдвэрийн сайд Д.Эрдэнэбат оролцлоо. Тэрээр Монгол Улс бараг бүх хэрэглээгээ гадаадаас импортолдог гэдгийг онцлоод энэ байдлыг өөрчилнө хэмээн ярьлаа. Өдгөө манай улсын нийт импортод бензин шатахуун 28 хувь, автомашин түүхийн сэлбэг хэрэгсэл 30, төмөр хийц эдлэл 10 хувийг эзэлж байгаа юм байна. Аж үйлдвэрийн яам дээрх тоон үзүүлэлтийг эсрэгээр нь өөрчлөх зорилготой аж.
Сайдын ярьснаар автомашинаа өөрсдөө үйлдвэрлэж чаддаггүй юм гэхэд нефьт боловсруулах, төмөр болон хуванцар эдлэлээ 100 хувь өөрсдөө хийдэг болчиход импортын барааны талаас илүү хувийг орлох боломжтой гэнэ. Тиймээс Дорноговь аймгийн Сайншанд, Дорнод аймгийн Тамсагийн сав газарт нефьт боловсруулах үйлдвэр байгуулахаар болжээ.
Одоо энэ хоёр байрлалд дээрх үйлдвэрийг барих ТЭЗҮ-ийг боловсруулж байгаль орчны үнэлгээ хийх ажлын хэсэг ажиллаж эхлэх юм байна. Төлөвлөсөн ёсоор явбал Монгол Улс 2020 он гэхэд бензин шатахуунаа өөрсдөө үйлдвэрлэдэг болох нь. “Худлаа юм биш, тэр үед ам.долларын ханш 1000 төгрөгнөөс буурна” гэж сайд Д.Эрдэнэбат ам бардам хэлсэн юм.
Мөн тэрээр “Долларын ханш өндөр байгаа үед үйлдвэрлэлээ дэмжих нь зөв. Нефьтийн үнэ буурсан мөчид үйлдвэр барих асуудлаа ярьж эхлэх нь ч зөв” хэмээн тодотгосон байна.
Д.Үжин
Сэтгэгдэл (79)