УИХ-ын гишүүн асан Л.Гүндалай Ардчилсан намаас гарч шинэ нам байгуулахаар болсон. Тэрбээр ирэх сонгуульд Эрдэнэтээс нэр дэвших сонирхолтой байгаа учраас тэнд нүүж очин суурьшиж буй. Мөн нам байгуулах ажлаа Эрдэнэт хотод өрнүүлж байгаа юм.

Тэрбээр өнгөрсөн долоо хоногт тус хотын иргэдтэй уулзалт хийсэн байна. Энэ үеэр намынхаа нэрийг “Ард түмнээ хайрлая” гэж нэрлэхээр болсон талаар дурджээ. Түүний шинэ намынх нь нэрийг сонссон хүмүүс "Эрдэнэтчүүдэд их долигнож байна аа" хэмээн шоглож суугаа гэнэ.

Тэрбээр өмнө нь "Хайрлахгүй байхын аргагүй" нэртэй ном бичиж худалдаанд гаргаж байв. Тус ном нь ч амжилттай борлуулагдаж бестселлер болж байсан. Тиймээс номноосоо ишлэл авч намаа нэрлэсэн бололтой юм.

Тэрбээр мөн эрдэнэтчүүдээс 801 гарын үсэг цуглуулах их ажлыг эхлүүлжээ. Тэрбээр маргаашнаас эхлэн тус хотын Амарын талбай, Барилгачдын талбай, Үйлчилгээний төвийн өмнөх газруудад явуулын “оффис” ажиллуулж иргэдээс гарын үсэг цуглуулах юм байна. Харин 801 гарын үсэг цуглах эсэх нь олны анхаарлыг ихээхэн татаж байна.

Т.Хулан