Хэдхэн  сарын өмнө 16 нярай Фенобарбитал хэмээх эмэнд хордож Эх хүүхдийн эрүүл мэндийн үндэсний төвд хэвтэн эмчлүүлж байлаа.  Шалтгаан нь эмчийн бичиж өгсөн Фенобарбитал эмийг хүүхдийн тунгаар олгох байтал “Монос-Эх нялхас” эмийн сангийн эмзүйч том хүний тунгаар бичиж өгсөнтэй холбоотой байсан. Үүнээс болж хүүхдүүд хохирч, харин уг эмийн сангийн эм зүйч хэрэгт татагдсан.

Гэтэл энэхүү хэрэг хуучраагүй байхад “Монос”-ынхон дахин асуудал үүсгэв. Энэ удаад Ланадексон, Ланасорбид гэсэн хоёр эмийг сольж өгснөөс найман хүүхэд хордлогод оржээ. Азаар эмч нар шаардлагатай арга хэмжээг шуурхай авсны хүчинд хордлого хүндрэхээс сэргийлж чадсан байна.

Тодруулбал, ЭХЭМҮТ хэвтэн эмчлүүлж байсан найман хүүхдэд Ланадексон эмийг хэрэглэх тун бичиж өгсөн байхад  “Монос”-ын эм зүйч андуурч өөр эм өгсөнөөс хүүхдүүдийн биед өөрчлөлт орж эхэлжээ.

Уг эмийг “Монос”-оос гэрээгээр нийлүүлдэг байжээ.  Бүр тодруулбал,  хоолны өмнө сүүгээр даруулж уулгадаг эмийн оронд зүрхний өвчинд уудаг Ланасорбидийг өгсөн нь энэ.

Ланадексоныг харшил хөдлөх, амьсгалын замын болон арьс, цусны өвчний үед хүүхдэд маш бага тунгаар уулгадаг юм байна.

Харин Ланасорбидийг зүрхний архаг дутмагшлын үед 10-20 мг-аар өдөрт 3-4 удаа уудаг эм аж.

Өөрөөр хэлбэл, харшил, ханиад томуугийн үед хэрэглэх зориулалттай эмийн оронд зүрхний өвчний эсрэг үйлчилгээтэй эм уусан хүүхдүүдэд тэр даруйдаа шинж тэмдэг илэрч эхэлснийг эмч нар нягталж үзэхэд Ланасорбид уулгасан байжээ.

Бид асуудлын мөрөөр хэвтэн эмчлүүлж байгаа хүүхдийн эцэг, эхтэй уулзахаар ЭХЭМҮТ-ийг зорьсон ч үүднийх жижүүр, сувилагчаас эхлээд уг мэдээллийг няцааж, үгүйсгэсэн юм.

Гэвч найман хүүхэд Моносын эм зүйч, Эх нялхасийн эмчийн хайнга байдлаас болж аюулд өртөх шахсан явдлыг сонсоогүй бас мэдээгүй юм шиг яавч өнгөрөөж болохгүй билээ.

Одоогоор нэг хүүхэд эмнэлгээс гарсан, хоёр хүүхдийн биеийн байдал нь сайжирсан байна. Харин үлдсэн таван хүүхэд үргэлжлүүлэн эмчлүүлж байгаа аж.

Дотоодын томоохон компани жил хүрэхгүйн хугацаанд хоёр ч удаа алдаа гаргалаа. Тэгвэл энэ бүхэнд шаардлагатай арга хэмжээ авах ёстойг иргэд хэлж байна. Тэд бухимдаж байна. Өнөөдөр хүүхдүүд эмэнд хордож биеийн байдал нь муудаад сэхэж байгаа ч дараагийн алдаан дээр алтан амиа алдахыг үгүйсгэхгүй.

Тиймээс итгэхийн аргагүй болсон монопол тодотголтой “Монос”-тоо хариуцлага тооцооч ээ эрхэм удирдлагуудаа. Л.Эрдэнэчимэг гишүүний данстай энэ газар удаа дараа ийм зөрчил гаргасаар байхад хэн ч дуугархгүй, ард иргэд л бухимдаад сууж байгаа нь ямар учиртай юм бэ?

24tsag.mn