Улс төрийн намуудын тухай хуулийг хэлэлцэхээр бэлтгэж буй энэ үед намуудын тэгш эрхийн тухай асуудал хурцаар хөндөгдөж байна. Тухайлбал, АН, МАН-ын гишүүд намын байрныхаа асуудлаар муудалцаад бөөн шуугиан тарьж буй.  АН-ын гишүүд дэмжигдчийн холбооны тэргүүн Т.Хасбаатар МАН-ыг улсын төсвөөр барьсан байраа хураалгах ёстой гэсэн мэдэгдлийг хийсэн.

Мөн УИХ-ын гишүүн А.Бакей “Зарим нам данхайсан том байшинтай. Түүнийгээ түрээслээд орлого олдог. Гэтэл зарим нь байргүй. Улс төрийн намуудад жигд, тэгш нөхцөл байдал бүрдүүлэх ёстой гэж би боддог” хэмээн байр сууриа илэрхийлж байна.

Энэ мэтчилэн МАН-ын төв байр Тусгаар тогтнолын ордон руу чиглэсэн шүүмжлэл сүүлийн үед тасарсангүй.

Хамгийн сүүлд УИХ-ын гишүүн Г.Батхүү “Намуудыг өмчийн болоод харилцааны түвшинд том, жижиг гэж ялгалгүй нэг түвшинд байлгах ёстой. Ингэхгүй бол намууд төлөвшихгүй” гэж ярьжээ.

Тэрбээр мөн “АН байртай байсан. Тэр байраа буулгаад шинээр байр барих уу, яахуу гэж ажлын хэсэг байгуулсан. Явцын дунд “Байр барих шаардлагагүй” гэж үзээд шинэ байр барих гэж байсан газраа дуудлага худалдаагаар худалдсан. Тэгэхээр ажлын хэсгийн ахлагч би болон манай намынхан ийм байр суурьтай байгаа. Одоо ашиглаж байгаа Төв шуудангийн өмнөх байраа ч томосгох талаар ярихгүй байгаа. Шаардлагатай гэвэл тэр байрыг төрийн өмчид шилжүүлэх эсвэл дуудлага худалдаагаар худалдахад бэлэн” гэв.

Үүнээс үзвэл АН-ыхан МАН шиг байрныхаа асуудлаар том шуугиан дэгдээж “Өгөхгүй” хэмээн гүрийхгүй бололтой.

Т.Энхэлээ