Шийдлийн засгийн газар бий болсноос хойш төрийн албан хаагчид ямар ч үндэслэлгүйгээр ажлаас халагдах тохиолдол ихэссэн талаар учир мэдэх хүмүүс хэлж байна. Улстөрчид үеийн үед төрийн албан хаагчдын орон тоо, цалин, тэтгэмжийн асуудлаар шоуддаг. Энэ байдал өнөөг хүртэл үргэлжилсээр. Нэг нам төрийн эрх барьж, харин тухайн намын гэх хүмүүс төрийн албанд дүүрдэг. Энэ зарчмыг халах ёстой гэж амтай болгон хэлдэг ч нэг л биелэлээ олж өгдөггүй.  Магадгүй энэ бүхнийг өөрчлөх хүсэл  улстөрчдөд, эрх баригчдад ч байхгүй  гэдгийг хэн ч хараад мэдэж байгаа биз.

Яам, агентлаг гээд төрийн байгууллагуудын дарга, удирдлагууд солигдохоор дагаад л орон тоо бүтцэд өөрчлөлт ордог. Ийм байдлаас болж зарим төрийн алба хаагчид  “дарга солигдоно” гэсэн сургаар л цомхотголд өртөж халагдах вий гэдэг айдастай явдаг болсон нь нууц биш.
Цаашлаад ямар нэг шалтаг шалтгаан хэлж “үндэслэлгүй” халсан гэх нэрийг зүүхгүйн тулд янз бүрийн арга саам ашиглаж ажилчдаа халдаг дарга нарч байдгийг энд дурдах нь зүйтэй биз.

Өнгөрсөн долоо хоногт Өргөдлийн байнгын хорооноос төрийн албан хаагчдын ажлаас халагдаж буй байдлын талаар мэдээлэл хийсэн. Учир нь тус хороонд ажлаас үндэслэлгүй халагдсан гэсэн нэр бүхий хүмүүс хандсаар байгаа юм. Мэдээж хувь хүний нууцад хамаарах зүйл тул өргөдлийг ил гаргах нь зохимжгүй ч үндэслэлгүйгээр халах тохиолдол ихэссээр байгааг ӨБХ-ноос мэдээлсэн.

Тэр дундаа Төрийн нарийн бичгийн даргын үүргийг түр орлон гүйцэтгэгчийг сайд дур мэдэн тушаал гарган тавьж байгаа, улмаар тэрхүү орлон гүйцэтгэгч хэнийг ч халах солих эрхгүй байтал   зарим яам, агентлагт төрийн албанаас олон хүнийг үндэслэлгүйгээр халж байгааг онцолсон.

Ийм төрлийн маргаан иргэний хэргийн шүүх дээр өч төчнөөнөөрөө байгааг ч холбогдох албаныхан хэлж байна. Тэгвэл энэ бүхнээс болж төрийн албан хаагчийг хууль зөрчин ажлаас нь үндэслэлгүйүгээр халсан нь тогтоогдвол төрийн албан хаагчид учирсан хохирлыг улсын төсвөөс нөхөн төлөх нөхцөл байдал үүсэхээр байгаа аж. Тиймээс энэ мэт төсөвлөгдөөгүй зардал улсын төсвөөс гарах тул Төрийн албаны тухай хуулийн 4-р зүйл, Иргэний хуулийн 498-р зүйлийн 5-д заасныг удирдлага болгон, учирсан хохирлыг төрийн албан хаагчдыг хууль бусаар ажлаас чөлөөлөх тушаал гаргасан эрх бүхий албан тушаалтнаас шаардан гаргуулах ёстой гэж учир мэдэх хүмүүс онцлоод байгаа юм.

Ийн төрийн албан хаагчдыг халах, сэлгэх тохиолдол хэрээс хэтэрч байгаад зарим түшээдүүд ч ам нээгээд эхэлсэн. Тухайлбал УИХ-ын дарга З.Энхболдын зүгээс  “Хөдөлмөрийн сайдын тушаалаар 57 хүнийг ажлаас халсан байна. Төрийн албан хаагчийг ийнхүү халж, солих нь улс төрийн албан хаагчдад хуулиар хориотой. Засгийн газрын гишүүд, сайд нар энэ хууль зөрчсөн үйлдлээ даруй засч, залруулахгүй бол УИХ хариуцлага тооцох болно” гэж ширүүхэн мэдэгдсэн билээ.

Үеийн үед төрийн албан хаагчдаар улстөржиж, тэднийг олноор нь ажилд авч, мөн олноор нь цомхотгож, дарга солигдох бүрт ийш тийш нь шидэлдэг энэ байдлыг үндсээр нь устгах хэрэгтэй байна.

24tsag.mn