УИХ-ын дарга З.Энхболд Тавантолгойн асуудлаар мэдэгдэл хийсэн. Тэрбээр Тавантолгойн хэлэлцээрийг УИХ-аар хэлэлцэж батлах ёстой. Хэлэлцүүлэхгүй гэсэн сайд нарыг огцруулна гэсэн билээ. Үүнтэй холбогдуулан Монгол улсын сайд М.Энхсайханаас зарим асуултад тодруулга авлаа.

- УИХ-ын даргын мэдэгдэлд та ямар байр суурьтай байна вэ?

-Ганц надад хандаж хэлээгүй байх. УИХ-ын зөвшөөрөлгүйгээр Тавантолгойн  гэрээ хэлэлцээрт гарын үсэг зурвал огцруулах асуудлыг тавина гэсэн. Энэ нь Үндсэн хуультайгаа нийцэж байна уу гэдгийг өөрсдөө сайн харах хэрэгтэй. Цөөхөн хэдэн улстөрчдийн 2016 оны сонгуулийн ажлаас огт өөр гэж би бодож байна.

-Хуулийн дагуу Тавантолгойн ажлын хэсэг УИХ-д ажлаа тайлагнах ёстой юу?

-Ажлын хэсэг бол Засгийн газраас байгуулагдсан. Тэгэхээр  ажлынхаа үр дүнг Засгийн газарт тайлагнана. Өнөөдөр Засгийн газар 16.00 цагт хуралдаж, хэлэлцээрийн үр дүнг хэлэлцэнэ. Хэлэлцээр бэлэн болсон гэсэн үг. Ер нь хууль тогтоох эрх мэдэлтэй байгууллага өвөр түрийндээ орчихсон байгааг өнөөдөр харлаа. Эрх мэдлээ тус, тусдаа хариуцдаг байх хэрэгтэй. Засгийн газар нь УИХ-ынхаа өмнө хариуцлага үүрдэг учраас Засгийн газар эцсийнхээ шийдвэрийг гаргаад УИХ-д оруулдаг. УИХ Засгийн газарт хуулийн орчныг нь үүсгээд эрхийг нь өгсөн. Засгийн газар ажлын хэсгээ байгуулаад шийдэх хувилбараа гаргана. Ажлын хэсэг ажлаа Засгийн газарт, Засгийн газар нь УИХ-д тайлагнана. Өөрөөр хэлбэл ажлын хэсгийн дотоод асуудалд УИХ шууд оролцож байгаа нь Үндсэн хуулиа зөрчиж байгаа хэрэг.

-Монгол Улсад ноцтой хохиролтой гэрээ байна. Мөн манай Засгийн газрын үүрэг тодорхой байхад хөрөнгө оруулагчийн үүрэг тунхагийн шинжтэй байна гэсэн? Та үүнд ямар тайлбар хийх вэ?

-Гэрээг Засгийн газар,  Улсын комисс өмнө нь хөрөнгө оруулалтын хэмжээ болон бусад асуудлыг бүгдийг нь харсан. Хөрөнгө оруулалтын тогтоож өгсөн хэмжээг хангаж байгаа. Засгийн газарт хэлэлцээд эцэслэн шийдэгдээгүй гэрээг УИХ-д албан ёсоор хүргүүлсэн зүйл огт байхгүй. Энэ тэнд явж байгаа ажлын материалуудыг аваад дүгнэлт хийж байгаа нь дэндүү гоомой хэрэг. Бид хэлэлцээрийнхээ явцыг УИХ-д тайлагнаж байсан болохоос эцсийн үр дүнг ажлын хэсэг Засгийн газарт танилцуулна.
 

Т.Энхэлээ