УИХ дахь АН-ын бүлгийн хуралдаанаар хэлэлцсэн асуудлын талаар УИХ-ын дарга, АН-ын дарга З.Энхболд, Монгол Улсын Ерөнхий сайд Ч.Сайханбилэг, АН-ын бүлгийн дарга Д.Гарамгайбаатар нар мэдээлэл хийв.

АН-ын бүлгийн дарга Д.Гарамгайбаатар ярихдаа “АН-ын бүлгийн хуралдаанаар 3 асуудал хэлэлцсэн. УИХ-ын дарга, Ерөнхий сайдын мэдээллийг сонсоод Тавантолгойн гэрээний асуудлаар шийдэлд хүрлээ. АН-ын бүлэг бусад намын бүлгүүдтэй Тавантолгойн гэрээний асуудлаар ажлын хэсэг гаргахаар боллоо. Мөн Тавантолгойн гэрээг УИХ-аар хэлэлцсэний дараа гэрээнд гарын үсэг зурах эрхийг олгох шийдэлд хүрлээ” хэмээв.

Үүний дараагаар тэд сэтгүүлчдийн сонирхсон асуултад хариуллаа.

-Монгол Улсын сайд М.Энхсайхан Тавантолгойн асуудлаар мэдээлэл хийхдээ УИХ-аар хэлэлцүүлэх шаардлагагүй гэсэн. Засгийн газрын байр суурь ямар байна вэ?

Ерөнхий сайд Ч.Сайханбилэг: -Энэ асуудлыг өнөөдөр бүлгийн хуралдаанаар хэлэлцлээ. УИХ-ын дарга болон гишүүдээс энэ асуудлыг шуурхай шийдвэрлэж өгөхийг хүссэн. Хамгийн цааш хугацаа нь 14 хоногийн дотор хэлэлцүүлж өгөхөөр нэгдсэн байр суурьт хүрлээ. Өнөөдөр Засийн газраар уг асуудлыг хэлэлцүүлсний дараа УИХ-д оруулж ирнэ. Би олон нийтэд хандаж хийсэн мэдэгдэлдээ том төслүүдээ хөдөлгөж, эдийн засгаа тэлэх болсноо мэдэгдсэн. Дахиж нийгэмд үл ойлголцол үүсгэхгүйн тулд энэ асуудлаа хэлэлцээд холбогдох шийдвэрийг гаргуулахаар болж байна.

-УИХ-ын даргын хэлсэн үгэн дэх баримтууд нь хоёрдугаар сард олон нийтэд танилцуулсан хувилбар байсан гэж байсан. Энэ талаар?

 УИХ-ын дарга З.Энхболд: -Нэгдүгээрт энэ өнөөдөр гарын үсэг зурах гэж байсан хувилбар. Өглөө 10.30 цагт ГХЯ-наас албан ёсоор цахимаар авсан. УИХ-ын вэб сайтад тавигдсан. М.Энхсайхан шиг хүн миний буруу зөв ярихыг шүүхгүй. М.Энхсайханы буруу зүйл хийж байгааг шүүдэг нь УИХ. Тийм учраас миний үгэнд итгэх хэрэгтэй. Тавантолгой бол нийт иргэд хувьцаатай онцлогтой компани. Ийм том хэмжээний хэлцлийг хувьцаа эзэмшигчид бүгд мэдэж, ойлгож, юу хэлэлцэх гэж байгаагаа танилцуулах ёстой. Нууц биш, Засгийн газраас эхнээс нь гэрээг ил тод байлгахыг шаардсан. Засгийн газрын хийж байгаа хэлэлцээрийг нийтэд ил тод гаргаж тавьж байна. Засгийн газрын оруулж ирсэн даруйд нь УИХ гэрээг яаралтай хэлэлцэж, гарын үсэг зурах эрхийг нь олгоно.

Т.Хулан