Тавантолгойн гэрээг УИХ-аар хэлэлцүүлсний дараа гарын үсэг зурж баталгаажуулах ёстой. Эс тэгвээс зарим албан тушаалтнуудад хариуцлага тооцно гэх мэдэгдлийг УИХ-ын дарга З.Энхболд хаврын чуулганы индэрээс мэдэгдсэн нь АН-ыг түргэн авахуулав.
Энэ нь түүний намынхантайгаа хэлэлцэж тохиролгүй хийсэн тоглолт байлаа. Мөн Ерөнхий сайд Ч.Сайханбилэг болон намын гишүүдэд нь гэнэтийн зүйл болов.
АН-ын бүлэг чуулганы нээлтийн дараа даруй хуралдаж уг асуудлыг хэлэлцээд Тавантолгойн гэрээг УИХ-ын чуулганаар хэлэлцэх нь зүйтэй гэсэн шийдвэрийг гаргасан юм. Тус бүлгийн хуралд Ерөнхий сайд Ч.Сайханбилэг, УИХ-ын дарга З.Энхболд зэрэг АН-ын гэх тодотголтой бүх хүн оролцсон бөгөөд хурал нилээн ширүүн явагдсан гэнэ.
Энэ нь ч М.Энхсайхан сайдын “Хүний гэрт зодоон болж байгаа тухай ярихаа болъё” гэж хэлснээс тов тодорхой байна. М.Энхсайхан сайд өчигдөр тус намын бүлгийн хуралд мэдээлэл хийх үеэр нилээн ширүүн “зодоон” болсон нь энэ аж.
Эх сурвалжуудын мэдээлж буйгаар АН-ын бүлгийн гишүүд Ерөнхий сайд Ч.Сайханбилэг болон УИХ-ын дарга З.Энхболд нарыг Тавантолгойн асуудлаар нэгдсэн ойлголтод хүрэхийг шаардсан гэнэ. Хэрвээ байр, суурийн нэгдсэн ойлголтонд хүрч чадахгүй бол АН-ын нэр хүнд ахиж сэргэхээргүй унана. Тиймээс заавал ойлголцолд хүр гэдэг шаардлагыг хурлынхаа үеэр тавьжээ. Мөн УИХ-ын даргын зүгээс Тавантолгойн гэрээг УИХ-аар хэлэлцүүлэхгүй бол Ерөнхий сайдыг огцруулна гэх асуудлыг хүртэл хөндсөн байна.
Тиймээс Ч.Сайханбилэг УИХ-ын дарга З.Энхболдод буулт хийн 14 хоног дотор УИХ-аар хэлэлцүүлэхээр болжээ.
Уг нь Ерөнхий сайд Ч.Сайханбилэг Тавантолгойг УИХ-аар хэлэлцүүлэхгүй шийдвэрлэнэ хэмээн төлөвлөж байжээ. Гэтэл З.Энхболдын үйлдэл бүр түүнд гэнэтийн цохилт өгөв.
Үүнээс үзвэл АН дотор Ерөнхий сайд бус намын дарга нь илүү хүчтэй байдаг бололтой гэсэн ойлголт олон нийтэд төрж байна.
Уг асуудлаар байр, суурь нь зөрүүтэй байгаа нам ганц АН биш бололтой. МАХН-МҮАН-ын “Шударга ёс” эвслийн бүлэг ч мөн Тавантолгойн асуудлаар дотроо хэрүүлтэй байгаа аж. МҮАН-ын дарга, Монгол улсын сайд М.Энхсайханы хувьд уг асуудлыг заавал УИХ-аар хэлэлцүүлэх шаардлагагүй. Шийдээд явах боломж нь Засгийн газарт байгаа гэсэн тайлбарыг хэлж байгаа бол тус намын гишүүн, УИХ-ын дэд дарга Л.Цог УИХ-аар хэлэлцэх шаардлагатай гэж үзэж гарын үсгээ зуржээ. Энэ мэтчилэн тус нам ч Тавантолгойн асуудлаар нэгдсэн шийдвэрт хүрээгүй байна. Тиймээс яахаа мэдэхээ больсон хэсэг нь бүлгийн хурлынхаа талаар мэдээлэл ч өгөхгүй зугатсан юм.
Харин Монгол улсын сайд М.Энхсайхан “Энэ гэрээ Засгийн газрын хуралдаанаар ороод үзэглэдэг юм гэхэд тэрний дараагаар УИХ-д танилцуулагдана. УИХ-ын дарга З.Энхболд “Тавантолгойн гэрээг байгуулахаас өмнө УИХ-аар хэлэлцүүлэх ёстой” гэсэн. Гэхдээ тийм хууль эрх зүйн шаардлага байхгүй. Хууль тогтоох эрх мэдэл, гүйцэтгэх эрх мэдэл тэгтлээ холилдох юм бол асуудал буруу болно” гэж хэлсэн.
Гэхдээ түүний хэлснээр асуудал шийдэгдэхгүй бололтой. Учир нь УИХ-ын дарга З.Энхболдын мэдэгдлийн дагуу уг асуудал УИХ-аар чуулганаар хэлэлцэгдэхээр болчихлоо шүү дээ.
Т.Хулан
