УИХ-ын дарга З.Энхболд Ерөнхий сайд Ч.Сайханбилэгийг унагааж өөрөө Ерөнхий сайд болох хүслээ УИХ-ын чуулганы үеэр илэрхийлчихлээ.  АН-ын гишүүд түүний эл үйлдлийг гайхах, зэвүүцэхийг зэрэгцүүлэн хүлээж авсан бол УИХ дахь МАН-ын бүлгийн гишүүд элэг доог хийн хүлээн авсан юм.

Харин улс төр хийгээд нийгмийн үйл явдлыг олон талаас нь харж, өөр өөрсдийн дүгнэлтийг хамгийн хурдан бөгөөд оновчтой хийдэг “цэцэн”-үүд  “Монгол улс 2 төртэй болсныг Ерөнхий сайд, УИХ-ын дарга хоёр ард тvмэндээ албан ёсоор зарлаад байгаам уу... ?!” хэмээн жиргэжээ. Үнэндээ УИХ-ын дарга З.Энхболд урьд өмнө гарч байгаагүй бараан түүхийг намынхаа нэрийн хуудсанд хавчуулж үлдээлээ. АН-ын түүхэнд ч тэр, УИХ-ын түүхэнд ч тэр өөрийн намын байгуулсан Засгийн газрыг унагаахаар УИХ-ын чуулганы индэр дээрээс улаан цагаандаа гарсан хэрүүл хийж байсан түүх байхгүй. Энд улс төрийн соёл, намын эрх ашиг, цаашилбал 2016 оны сонгуулиар ялалт байгуулах тухай дурьдахын ч хэрэг алга. Намынх нь дарга сонгуулийн өмнөх жил ийн аашилж өөрийн хийгээд өрөөлийн нэр хүндийг шавартай хутгаж байхад. Товчхондоо нэг үхрийн эвэр доргивол мянган үхрийн эвэр доргино гэж З.Энхболдын хэлсэн үг хийсэн үйлдэл АН-ынханыг тэр чигт нь доргиож, шуудайд хийсэн үхрийн эвэр шиг л эв нэгдлийг бусниулж эхлэв.

Үнэндээ урьд өмнө нь ийм улаан цайм мэдэгдэл гарч байгаагүй. Олон нийт УИХ-ын даргыг ёс зүйгүй, улс төрийн соёлгүй, цагаандаа гарсан, юу ч хийхээс буцахгүй хэмээн шүүмжилж байна.

Мөн УИХ-ын даргын бас нэгэн “гариг андуурсан” мэдэгдэл нь “ТАХ-ийг халж болохгүй” гэх үг. Энэ мэдэгдэл нь үнэндээ нүдээ олсонгүй. Естой л ниргэсэн хойно нь хашгирав гэгч боллоо. Харин сөрөг хүчнийхэн УИХ-ын даргын энэхүү мэдэгдлийг тавлаж, инээлдээд өнгөрөв. Тэдэнд инээх учир олон бий. Наад зах нь ТАХ-ийг аль хэдий халаад дууссан. Бас УИХ-ын индэр дээрээс Засгийн газартайгаа тэрсэлдэн, тэр бүү хэл шууд утгаараа биш ч “Бууж өг” гэх үгтэй агаар нэгэн адил үг дайсан нь МАН-ынханы хөх инээдийг хүргэсэн хэрэг. Тэртэй тэргүй үйл ажиллагаа нь нам зогссон АН-ын дотоод зөрчил хурцдаж, дотор хоорондоо хэмлэлдэж хэмхэлдэж, намын дарга нь гишүүд рүүгээ довтолж л байвал МАН-ын урагшлах зам улам л дардан болно гэсэн үг. Ямартай ч олон улсын тавцанд Монгол улсын нэр хүндийг унагаж, гавар шавхайтай хутгасан АН-ын дарга өөрийн намын байгуулсан Засгийн газраа 2 дахь удаагаа унагаахаас буцахгүй гэдгээ ийнхүү мэдэгдлээ.