Эх хүүхдийн эрүүл мэндийн үндэсний төвд хэвтэн эмчлүүлж байсан найман сартайгаас 15 настай хүүхдүүд ажилтнуудын хариуцлагагүй үйлдлээс болж өөр төрлийн эм хэрэглэж, хордлого авсан тохиолдол хэдхэн хоногийн өмнө гарсан. Тэгвэл энэ талаар МХЕГ-аас мэдээлэл өглөө. Тухайн үед тус эмнэлэгт олгож байсан Ланадексон эм дуусч “Монос”-ын эмийн агуулах руу утасдаж эмээ захиалахад андуурч Ланасорбид гэх эмийг ирүүлсэн байна. Андуурагдаж ирсэн ланасорбид эм нь насанд хүрэгчид уух ёстой зүрхний архаг дутагдлын эм бөгөөд хүүхдэд мэдэлгүй олон хоног өгсөн бол амь насанд нь хүрэх аюултай байжээ.

Энэ талаар МХЕГ-ын Эрүүл мэнд, боловсрол, соёлын хяналтын газрын дарга Н.Гансүх “Энэ асуудал цэвэр байгууллагын удирдах ажилтны хариуцлага, дотоод хяналт сул, ажил үүргээ хүлээж ажиллаж байгаа хүмүүсийн сахилга баттай холбоотой. Ер нь эмийн захиалга өгөхдөө утсаар мэдээлэх ёсгүй. Мөн мэргэжилтнүүд эмийг худалдааны нэршлээр бус олон улсын нэршлээр ярих ёстой. Энэ бол ямар ч сонгон шалгаруулалтгүйгээр эмийн таталтаа хийдэг хуулийн цоорхой. Тиймээс бид хариуцлага алдсан ЭХЭМҮТ-ийн дарга болон “Монос”- ын удирдлагад албан шаардлага хүргүүлж хариуцлага тооцно” гэлээ.

Д.Ундрах /24tsag.mn/