СТӨ-нд АН-ын 25 жилийн хүндэтгэлийн хурал болж байна. Тус хурлыг эхлүүлж  АН-ын дарга З.Энхболд илтгэл тавьсан юм. Энэ үеэр АН-ын ҮЗХ-ны гишүүн Д.Мөнх-Эрдэнэ нарын гишүүд, дэмжигчид тус намд тулгараад байгаа асуудлаар үзэл бодлоо илэрхийлж, тайван байдлаар эсэргүүцлээ илэрхийлэв. Гэвч үзэл бодлоо илэрхийлэх гэсэн залуусаа сонсохгүй, бүр хурлаас хөөж гаргасан үйлдэл боллоо. Тодруулбал, баярын хурлыг зохион байгуулагчдын зүгээс залуучуудыг хөөж гарган барьж байсан уриа лоозонг нь урж тасдаж хаясан юм.

Баярын хурлаас хөөгдөж гарсан залуу гишүүд хэлэхдээ “Бид нар З.Энхболд даргыг үг хэлж байх үеэр уриа лоозон барьж зогссон юм. З.Энхболд даргыг үгээ хэлж дууссаны дараа хурлаа тайван байдлаар үргэлжлүүлнэ гэсэн бодолтой байсан. Бид юу ч ярьж, дуугарч эмх замбараагүй байдал үүсгээгүй. Зөвхөн  тайван байдлаар уриагаа барьж зогсож байхад биднийг хөөж гаргаж, барьж байсан зүйлийг урж тасдаж хаялаа. Энэ намд залуучуудынхаа дуу хоолойг сонсдог байдал хол орхигджээ. АН-ын дарга З.Энхболд эрх мэдлээ хэтрүүлж, сонгуулийн тойргийг ганцаараа дур мэдэж байгаагаас эхлээд тус намын дүрмийг зөрчсөн ноцтой зөрчлүүдийг ихээр гаргасан. Тиймээс бид уг үйлдлийг нь эсэргүүцэж үзэл бодлоо тайван байдлаар илэрхийлж байгаа билээ” гэв.

24tsag.mn

Зургийг ikon.mn сайтаас