Хууль зүйн байнгын хорооны хуралдаанаар Казиногийн тухай хуулийг хэлэлцэх эсэхийг хэлэлцээд гишүүдийн 78 хувийн саналаар дэмжлээ. Тус хуулиар хоёр байгууллагад 10 жилийн хугацаатай Казино явуулах эрхийг нь олгох юм байна. Гэхдээ тус хоёр байгууллага нь өөр, өөр байршилд байна гэдгийг хууль санаачлагчид хэллээ.  Мөн Казинод Монгол иргэн орж тоглохгүй гэсэн заалттай байгаа юм. Харин гадны иргэний хувьд 21 нас хүрсэн байх шаардлагатай гэсэн шалгуурыг тавьж байгаа аж.

Хуулийн төслийг хэлэлцэх эсэхийг байнгын хороогоор хэлэлцэх үеэр зарим гишүүд саналаа хэллээ.

Тухайлбал, УИХ-ын гишүүн Ё.Отгонбаяр Монгол хүн орж тоглож болохгүй гэсэн заалтыг эсэргүүцэж санал хэлж байв. Харин ажлын хэсгийн ахлагч, БОНХАЖ-ийн сайд Д.Оюунхорол “Өмнө нь Казино байгуулахад монголчууд ихээр орж тоглон олон айл өрх, албан байгууллагууд дампуурч байсан түүхтэй. Бид тэр бүхнээс болгоомжилж ийм шийдвэр гаргасан. Эхэндээ гадны иргэдийг тоглуулж туршлага олж авчихаад дараа нь монголчуудаа тоглуулдаг болох талаар заалт нэмж оруулж болох байх” гэв.

Харин Л.Болд гишүүн энэ хуулийг хэрэгжүүлбэл 1998 оны үйл явдлыг давтана. Энэ хуулийг боловсруулахдаа Монгол орны онцлог болоод хууль эрх зүй, эдийн засагт тохируулж боловсруулаагүй хууль байна. Ийм хуулийг дэмжих боломжгүй. Засгийн газар энэ хуулиа эргүүлэн татах хэрэгтэй гэсэн саналыг хэлэв.

О.Баасанхүү болон Х.Тэмүүжин нарын гишүүдийн хувьд бусад холбоотой хуульдаа бүгдэд нь өөрчлөлт оруулахгүйгээр ингээд баталж болохгүй. Эрүүгийн хууль болон гадаад харилцааны хууль зэрэг маш олон хуульд өөрчлөлт оруулахгүй бол болохгүй шүү гэсэн юм. Тус хуулийг баталбал

Монгол улсын эдийн засагт эерэг нөлөө үзүүлж төсвийн орлого олон тэрбум төгрөгөөр өснө гэсэн тооцолол байгаа аж. Хууль санаачлагчдын зүгээс хуулийг хэлэлцэх явцдаа илүү боловсронгуй, сайн болгож болно гэж байв.

Т.Энхэлээ