АН-ын гишүүд дэмжигчдийн холбооны тэргүүн Т.Хасбаатар мэдээлэл хийлээ. Тэрбээр өмнө нь МАН-ын Төв байрыг ард түмний мэдэлд шилжүүлэхийг шаардсан. Тодруулбал, МАН 14.6 тэрбум төгрөгөөр “Тусгаар тогтнолын ордон”-г  барихдаа төрөөс татвар төлөгчдийн 11 тэрбум төгрөгийг хууль бусаар гаргуулсан. Тиймээс 11 тэрбум төгрөгийг эргэн төлүүлэхээр шүүхэд хандана гэж мэдээлсэн юм. Мөн тэрбээр Тусгаар тогтнолын ордныг Залуусын номын сан болгоё гэсэн уриалгыг гаргаад байгаа юм.

Тэгвэл тэрбээр өнөөдөр дээрх асуудлаар АТГ-т хандахаар болсноо мэдэгдлээ.

Тэрбээр мөн “Намайг мэдээлэл хийсний дараа Ж.Мөнхбат хэвлэлээр олон удаа мэдэгдэл хийж "АН-ын байруудыг мөн хурааж эмнэлэг болгоё" гэсэн. Бид хоёр нэг зүйлд санал нэгдэж байгаагийн илрэл бол энэ. Би МАН-ын байрыг номын сан болгоё гэсэн. Харин Ж.Мөнхбат АН-ын байруудыг эмнэлэг болгоё гэж уриаллаа. Тэгэхээр бид хоёрын эцсийн зорилго нийгэм рүү гээ чиглэсэн байна. Тэгэхээр Ж.Мөнхбатыг надтай хамт суугаад мэдэгдэл гаргаасай гэж хүсч байна” гэв.

Мөн дэлхийн аль ч соёлт улс оронд улсынхаа нийслэлд том байртай түүнийгээ түрээсэлж ашиг олдог  МАН шиг нам байхгүй гэлээ.

Т.Энхэлээ