УИХ-ын чуулганы намрын хуралдаан Цагаан сарын өмнөхөн завсарладаг. Харин хаврын чуулган наадмын өмнө завсарладаг. Баярын үеэр завсарладаг дээрх байдлыг далимдуулан хуулиудыг бөөнөөр нь баталдаг жишиг манай УИХ-д тогтоод байгаа билээ. Энэ байдлыг цэгцлэх асуудлаар УИХ-ын гишүүн Д.Тэрбишдагва мэдээлэл хийлээ. Тэрбээр уг асуудлаар улс төрчидтэй хамтран судалгаа хийсэн байна.

Манай улс 2006 оноос хойш нийт 197 хуулийг баяр дөхүүлж баталсан байна. Үүнд, Үндсэн хуулийн өөрчлөлт хүртэл багтсан талаар тэрбээр ярилаа. УИХ-аар Үндсэн хуульд хоёр удаа өөрчлөлт оруулахдаа хоёуланг нь баяртай давхцуулж байжээ.

Дээрх 197 хуулийг ажиглавал бүгд олон нийтэд хүлээлт үүсгээд байсан улс  төр, эдийн засгийн чухал ач холбогтой хуулиуд аж. Үүнээс үзвэл чухал хуулиудыг олон нийтийн санаа бодол өөр зүйлд чиглэгдсэн үед иргэдийн анхаарлаас гадуур баталдаг нь харагдаж байгаа юм. Харин ингэж баталж буй шалтгаан нь улс төрийн лобби, авлигалтай холбоотой байж болно гэсэн хардлагыг олон нийтэд төрүүлж байна.

Одоо ч уг байдал хэвээр байгаа бөгөөд чухал хуулиудыг цагт баригдан олонхийн саналаар хүч түрэн баталж байгаа юм.

Хамгийн сүүлд гэхэд Ашигт малтмалын тухай хуульд өөрчлөлт оруулах, Гацууртын ордын төрийн эзэмшлийн хувь хэмжээг тогтоох тухай, Урт нэртэй хуульд өөрчлөлт оруулах тухай, Цагаан суваргын ордод төрийн эзэмшлийн хувь эзэмших тухай хууль зэрэг ашигт малтмал, уул уурхайтай холбоотой хуулийг Цагаан сарын өмнөх өдрүүдэд заримыг нь бүр битүүний өдөр хэлэлцэж, баталсан асуудал байгаа юм.

Баяр дөхүүлж яарч, сандран хууль батлах нь маш олон сөрөг талтайг Д.Тэрбишдагва гишүүн хэллээ. Тухайлбал, хууль дутуу, дулимаг батлагдаж нийгэмд гарах сөрөг үр дагавар нь ихсэх, хэрэгжилт нь муудах зэрэг олон сул талтай аж.

Мөн энэ хаврын чуулганаар хэлэлцэгдэхээр төлөвлөгдөөд буй Улс төрийн намын тухай хууль, Улс төрийн намын санхүүжилтын тухай хууль, Сонгуулийн тухай хууль, Өршөөлийн тухай хууль, Эдийн засгийн өршөөлийн тухай хууль зэрэг олон чухал хуулийг мөн л  наадмын өмнөхөн батлахаар оруулж иржээ. Эдгээр хуулиудыг өмнөх хуулиуд шиг алдаатай батлахгүйн тулд эртхэн хэлэлцэх ёстойг тэрбээр мөн санууллаа. Тухайлбал, ирэх сарын ихээр хэлэлцэж маш сайн чамбайруулж байж батлах шаардлагатай гэв. Тиймээс уг хуулиудыг урагш нь татаж хэлэлцэх асуудлуудын эхэнд тавиулах саналыг Д.Тэрбишдагва гишүүн гаргах юм байна.

Т.Хулан