Шадар сайд У.Хүрэлсүх өнгөрсөн сард Японы Сэндэй хотноо болсон “Гамшгийн эрсдлийг бууруулах” дэлхийн гуравдугаар бага хуралд оролцсон. Тэгвэл Монголоос томилогдсон ажлын хэсэг уг хуралд ямар үр дүнтэй оролцсон талаарх ажлын тайланг өнөөдөр сэтгүүлчдэд хүргэлээ.

НҮБ-ын Гамшгийн аюулыг бууруулах газраас зохион байгуулсан энэ хуралд дэлхийн 20 гаруй орны төр засгийн удирдагчид, 100 гаруй сайд, 20 гаруй олон улсын байгууллага, НҮБ-ын 15 төрөлжсөн байгууллага, 200 гаруй төрийн бус байгууллагын өндөр дээд хэмжээний зочид төлөөлөгчид оролцсон байна.  Харин Монгол улсаас Шадар сайд У.Хүрэлсүх, ОБЕГ, Нийслэлийн Боловсролын газар, Барилга хот байгуулалтын яам, Дэлхийн зөн Монгол байгууллага, Японы хүүхдийг ивээх сангийн Монгол дахь төлөөлөгчийн газар, Монголын улаан загалмайн нийгэмлэгийн төлөөлөгчид оролцжээ.

Хуралдаанд оролцсон дээрх хүмүүс Гамшгийн аюулыг бууруулах талаар мэдлэгээ нэмэгдүүлснээс гадна гамшиг болсон бол ямар ажлыг хийх аргыг эндээс сурч, мэдсэн гэдгээ энэ үеэр хэллээ.

Шадар сайд Х.Хүрэлсүхийн хувьд тус хуралд идэвхтэй оролцож Монгол улсын Гамшгийн аюулаас сэргийлэх ажиллагааны баримт бичгийг хэрэгжүүлэх чиглэлээр Засгийн газраас авч хэрэгжүүлсэн ажлыг танилцуулсан байна.

Мөн 2015-2030 он хүртэл Гамшгийн эрсдлийг бууруулах Сэндай хотын төрийн баримт бичгийг хэлэлцэн батлахад амжилттай оролжээ. Энэ уулзалтын үеэр Монголын гамшгийн эрсдлийг бууруулах ажлыг цаашид бэхжүүлэх, тус салбарт ажиллаж байгаа аврагч, албан хаагчдыг хамгаалах чиглэлээр хэд, хэдэн хэлэлцээрийг мөн хийсэн байна.  Орос, Хятад, Япон улсуудын сайд нартай албан уулзалт хийж энэ чиглэлээр хоёр талын хамтын ажиллагааг сайжруулах асуудлыг  ярилцсанаас гадна техникийн тал дээр тусламж хүсэх талаар холбогдох хүмүүстэй санал солилцож ажил хэрэг болгохоор болжээ. Мөн тэрбээр гамшгийн эрсдийг бууруулах үйл ажиллагаанд хүүхэд залуучуудын оролцоог нэмэгдүүлэх, эмэгтэйчүүд болон эмзэг бүлгийнхний гамшигт өртөмтгий байдлыг бууруулах, олон нийтийг аюулгүй амьдрах уламжлалт арга ухаанд сургах зэрэг саналыг хурлыг үеэр гаргажээ.

Тус хурлаас гарсан шийдвэр, зөвлөмжүүдийг Монголын холбогдох хуульд тусгаж удахгүй УИХ-аар хэлэлцүүлэхээр бэлтгэж байгаа талаар Шадар сайдын ажлын хэсгийхэн энэ үеэр ярилаа.

Эцэст нь дэлхийн улс орнууд нэг зорилго үзэл санаанд нэгдэн, гамшгийн эрсдэлийг бууруулах олон улсын тогтолцоог хүртээмжтэй болгохыг уриалжээ.

Т.Хулан