Б.Болдбаатар гэж дийлдэггүй “том” толгойтой нөхрөөс болж Гадаад хэргийн яамны ажил гацаанд ороод байгаа талаар ажилчид ярьж эхэллээ. Б.Болдбаатар нь Л.Болдыг Гадаад хэргийн яамны сайдаар ажиллаж байх үед тус яамны Төрийн нарийн бичгийн даргаар томилогдож байжээ.
Гэтэл түүнийг Төрийн албаны зөвлөлөөс эрхзүйн чадамжгүй гэж үзэн уг томилгоо нь Төрийн албаны тухай хуулийн холбогдох заалтуудыг зөрчсөн тул тус албан тушаалд дахин нээлттэй сонгон шалгаруулалт хийхийг хүссэн албан бичгийг Засгийн газрын хэрэг, эрхлэх газрын дарга С.Баярцогт руу илгээжээ. Тодруулбал, Б.Болдбаатарыг сонгон шалгаруулалт хийлгүйгээр албан тушаалд томилсон байна гэж үзсэн байна. Гэтэл С.Баярцогт сайд асуудлыг шийдэлгүй өдийг хүргэсэн байна.
Б.Болдбаатартай холбоотой бас нэгэн ноцтой асуудал байгаа юм. Тодруулбал, түүнийг хувийн ашиг сонирхлын зөрчилтэй гэж үзэж байгаа аж. Б.Болдбаатарын хувьд өөрийн болон гэр бүлийн гишүүдийн хувь эзэмшдэг “Тэмо” ХХК, “Макото” ХХК, “Нэпко” ХХК гэсэн компаниудтай. Мөн “Гишүүнчлэл, хуулийн этгээдийн удирдах зөвлөлийн гишүүн” хэсэгт “Фаблаб” ТББ-ын үүсгэн байгуулагч, “Мэдээлэл холбооны судалгаа хөгжлийн төв” ГҮТББ-ын үүсгэн байгуулагч, “Регбинийн холбоо” НҮТББ-ын удирдах зөвлөлийн дарга зэрэг хэд, хэдэн газар давхар албан тушаалтай байгаа юм байна. Ийм олон ТББ, компанитай хүн яамны Төрийн нарийн бичгийн дарга хийж болохгүй гэдэг нь хуулиар тов, тодорхой заагдсан зүйл.
Мөн Б.Болдбаатар нь Гадаад харилцааны яамны Төрийн нарийн бичгийн даргын ажилд тэнцэх хэмжээний биш хэмээн холбогдох газраас үзэж байгаа аж. Ядаж л олон улсын харилцааны мэргэжилгүй, салбартаа 5 аас дээш ажлаагүй, гурваас дээш гадаад хэлний мэдлэггүй учраас тус албан тушаалд очих хэмжээний наад захын шалгуурыг хангаагүй байна.
Энэ мэт хууль зөрчсөн түүнтэй холбоотой асуудлууд хөвөрсөөр байна. Саяхан Засаг төр хөдөлгөөнд орж тус яаманд шинэ сайд очоод хууль зөрчиж албан тушаалд томилогдсон Төрийн нарийн бичгийн даргадаа сануулга өгсөн байна. Гэтэл Б.Болдбаатар нь ажлаа хүлээлгэж өгөхөөс татгалзаж, ажлынхаа байранд ч ирэхгүй байгаа сурагтай. Энэ үйл явдлаас болоод Гадаад хэргийн яам бичиг баримтын ажлаас эхлээд төсөв санхүү, зарлагын баримттай холбоотой ажлууд хойшилж, ажил явуулахад хүндрэл үүсчээ. Энэ асуудлыг холбогдох эрх бүхий байгууллага анхааралдаа авахгүй бол Гадаад хэргийн яамны ажил урагшлахгүй бололтой.
Т.Хулан
Сэтгэгдэл (16)