Улс төрийн том намууд сонгуулийн тойргоо хуваах асуудлаар аль хэдийн дотооддоо ярилцаад эхэлжээ. АН-ын дарга З.Энхболд л гэхэд намын гишүүдээ хүлээн авч уулзан толгой мэдэн тойргийг хувааж өгсөн талаар хэл, ам гараад байгаа.  Гэхдээ эцсийн байдлаар шийдвэрээ гаргаагүй байгаа учраас бүх зүйл нууцлагдмал  байгаа юм. Ямартаа ч хэн ямар тойрогт очих талаар намуудын гишүүд дотроо бодолтой, доороо суурьтай болжээ. УИХ-ын гишүүдийн хувьд аль хэзээний сонгуулийн шоугаа хийгээд эхэлчихсэн.

Тэд ямаа самнаж, бүжиг бүжиглаж, дуу дуулж, цас ухаж, эмнэлэг цэвэрлэхээс эхлээд эгээтэй л иргэдийн гэрт нь очиж хашаа хороог нь цэвэрлэж өгөх нь халгүй байгаа юм.  

Тэднээс гадна УИХ-ын гишүүнээр ажиллаагүй хүмүүс ч ирэх сонгуульд нэр дэвших бодолтой байгаа бололтой. Тэд одоогийн гишүүдтэй хүч үзэж ирэх жилүүдэд парламентад суухаар бэлтгэл ажилдаа аль хэдийн оржээ. Тухайлбал, УИХ-ын гишүүн асан Л.Гүндалай АН-аас гарч “Ард түмнээ хайрлая” нэртэй нам байгуулж буй. Тэрбээр ирэх сонгуульд Эрдэнэт хотоос УИХ-д хүч үзэхээр тус аймагт нүүж очоод байгаа юм. Мөн сүүлийн хоёр долоо хоног эрчимтэй кампанит ажил явуулж иргэдийн гарын үсгийг цуглуулж байгаа гэх.

Түүнийг гэнэт зангаа хувирган Эрдэнэт рүү урвасныг Хөвсгөлийнхэн их дургүй хүлээж авч байгаа гэнэ. Төрсөн нутгаа хол, сумд нь зайтай, зам нь бартаатай, нэг очиход нэлээд зардал гардаг учраас ойроор нь Орхон аймгийг сонголоо гэсэнд хамгийн их бухимдаж байгаа аж.

Тиймээс Хөвсгөл аймгийн залуус цахим хуудастаа “Хөвсгөлчүүд Гүндалайгаас далай нэрээ буцааж авъя” гэсэн хөдөлгөөн өрнүүлээд амжсан байна. Түүний хувьд “Би далай ээжээ шүтдэг” хэмээн сонгуулийн пиар хийж, дуучин Т.Дэлгэрмөрөнгийн дуулсан “Далай ээж” дууны клипийн ивээн тэтгэж байсан удаатай.

Л.Гүндалай Эрдэнэтийг тойргоороо сонгож ажиллаж байгаа бол экс гишүүн Д.Балдан-Очир Дархан-Уул аймгаас салахаа больсон сурагтай. Тэнд гурилын шинэ үйлдвэр ашиглалтад оруулахаар ийнхүү ажиллаж байгаа аж. Энэ учрыг зарим нь тойрогоо бэлдэж явна хэмээн ярьжээ. 2004 онд тэрээр Завхан аймгаас нэр дэвшиж сонгогдсон бол 2012 сонгуульд өвдөг шороодож байсан юм. Түүнтэй адил Ш.Сайхансамбуу Завхан аймагт гурил тэжээлийн үйлдвэрээ өргөтгөх, ажлын байр нэмэгдүүлэх гэхчилэн хуучин тойрогтоо ажлаа үргэлжлүүлж буй түүнийг мөн л ирэх сонгуульд дэвшихээр бэлтгэлээ базааж байна гэсэн яриа гарч байгаа аж.

Т.Энхэлээ