Аж үйлдвэрийн яам, “Замын-Үүд” чөлөөт бүсийн Захирагчийн ажлын алба, Замын-Үүд сумын ЗДТГ хамтран “Хөрөнгө оруулагчдын чуулга уулзалт-2015”-ыг Дорноговь аймгийн Замын-Үүд суманд энэ сарын 25-нд зохион байгуулах гэж байна. Хөрөнгө оруулагчдын чуулга уулзалтын зорилго нь "Замын-Үүд" чөлөөт бүсийн өнөөгийн байдлыг танилцуулах, хөрөнгө оруулалт татах, бүсийн хөгжлийн талаар зөвлөлдөхөд оршиж байгаа юм.

Чуулга уулзалтад Аж үйлдвэрийн сайд Д.Эрдэнэбат, Барилга хот байгуулалтын сайд С.Цогтбаатар болон холбогдох албаны хүмүүс, гадаад дотоодын хөрөнгө оруулагчид, бизнес эрхлэгчид оролцож, хэлэлцүүлэг өрнүүлнэ.

Ийнхүү “Замын-Үүд” чөлөөт бүсийн эхний ээлжийн дэд бүтэц, инженерийн шугам сүлжээг барьж байгуулах ажил хийгдсэнээр цаашид хувийн хэвшлийн хөрөнгө оруулалт татах, бизнесийн үйл ажиллагааг эхлүүлэх боломж бүрдлээ.                                                                 

Тиймээс тус чуулга уулзалтад хөрөнгө оруулагчид, бизнес эрхлэгчид та бүхнийг өргөнөөр оролцохыг урьж байна. Чуулга уулзалтын бүртгэл Засгийн газрын XI  байр, “Замын-Үүд” чөлөөт бүсийн Захирагчийн ажлын албаны  1106 тоотод  энэ сарын 15-23-ны өдрүүдэд явагдана. Хөрөнгө оруулагчдын чуулга уулзалтад оролцох хүсэлтэй бизнес эрхлэгчид, иргэд дараах утсаар холбоо барьж, дэлгэрэнгүй мэдээллийг авах боломжтой.

Холбоо барих утас: (976-51) 330294, 264310