УИХ дахь Ардчилсан намын бүлгийн хуралдаанаар өчигдөр Тавантолгойн асуудлыг хэлэлцсэн. Хуралдаанд Монгол Улсын сайд М.Энхсайхан оролцсон.

Тэрээр гэрээний төсөлтэй холбогдуулж гишүүдийн асуултад хариулт өгсөн.

Гэхдээ гишүүд Тавантолгойн гэрээнд саналаа нэгтгээгүй тул өнөөдөр бүлэг 16.00 цагт дахин хуралдахаар болсон юм.

Тус бүлэг өчигдрийн  хуралдаандаа “Эрдэнэс тавантолгой” компанийн захирал асан Я.Батсуурийг оролцуулж компанийн үйл ажиллагаатай холбоотой мэдээллийг авсан. Өмнөх Засгийн газрын үед “Эрдэнэс тавантолгой” компани нь Хятадын "Чалько" компанитай гэрээ байгуулж, 350 сая ам.доллар зээлж авсан бөгөөд энэ өрийг Тавантолгой ордоос олборлосон нүүрсээр дарах юм.

Гурван жил орчмын хугацаанд нүүрсээ нийлүүлсэн ч одоогоор 100 гаруй сая ам.долларын өр үлдсэн байгаа аж. Уг нь энэ өрийг өнгөрсөн жилийн үндэсний их баяр наадмын дараахан төлж дуусгах төлөвлөгөөтэй ажилласан ч дэлхийн зах зээлд нүүрсний үнэ унасан нь “Эрдэнэс тавантолгой” компани олборлолтоо хэчнээн нэмэгдүүллээ ч өр дарах хэмжээнд дорвитой ашиг олоогүй гэдгийг албаны хүмүүс танилцуулсан юм.