Төрийн байгуулалтын байнгын хорооны хуралдаанаар Засгийн газраас энэ сарын 1-ны өдөр өргөн мэдүүлсэн Засгийн газрын 2012-2016 оны үйл ажиллагааны хөтөлбөрийн хэрэгжилтийг хэлэлцлээ. Гишүүдийн зүгээс Засгийн газрын мөрийн хөтөлбөрийн үйл ажиллагааны хэрэгжилтэд тааруу гэсэн дүгнэлтийг өгөв. Тэд уг асуулдалд нилээн шүүмжлэлтэй хандаж байсан юм.
Тухайлбал УИХ-ын гишүүн Д.Лүндээжанцан “Сэтгэл дундуур байна. УИХ-ын даргын дэргэдэх зөвлөл дээр хэлэлцсэн болоод, оромдоод хаяжээ. Өнөөдрийн байнгын хорооны байдал, хэлэлцэж байгаа царай гээд харахад. Засгийн газрын мөрийн хөтөлбөрт 300 гаруй зүйл заалт, том зорилт тавьсанаас 200-гаад нь 50 хувь хүрэхтэй үгүйтэй явж байна. 100 гаруй зорилт нь 50 хувиас дээш биелэлтэй. Дөрвөн жилийн бүрэн эрхийн хугацааны 3 жил нь ард хоцорсон. Одоо нэг жил хүрэхгүй хугацаа үлдсэн. Үлдсэн 50 хувийг нь жил хүрэхгүй хугацаанд гүйцэлдүүлэх гэж байгаа юм шиг ойлгогдож байна. Эдийн засгийн хүндрэлээс болоод Засгийн газрын мөрийн хөтөлбөр хэрэгжих боломжгүй гэх байх л даа. Шалтгааныг нь сонсмоор байна. Засгийн газрын мөрийн хөтөлбөрөөс олон зорилт хэрэгжээгүй байна. Тиймээс мэдэгдэл хийх хэрэгтэй. Бид сүүлийн үед Тавантолгой зэрэг том, том төсөл хөтөлбөр яриад хүмүүсийн амьжиргаатай холбоотой асуудлыг орхигдоход хүрчээ. Үүнийг хайнга байдлаар хэлэлцүүлж болохгүй. Тиймээс Засгийн газрын мөрийн хөтөлбөрийг нээлттэй орхиод шаардлагатай бол УИХ-д оруулах хэрэгтэй” гэсэн юм.
Түүний асуултад ЗГХЭГ-ын дарга С.Баярцогт хариулахдаа “Эдийн засгийн хувьд байдал хүндхэн байгаа. Төсвийн хүрээний мэдэгдлийг оруулж ирэхэд та бүхэн илүү тодорхой мэдэх байх. Удахгүй хэлэлцэнэ. Засгийн газрын түвшинд дахин тодотгол хийх шаардлага үүснэ” гэсэн юм.
Т.Энхэлээ
Сэтгэгдэл (1)