УИХ-ын Эдийн засгийн байнгын хорооны хуралдаанаар “Таван толгойн нүүрсний ордыг хөгжүүлэх талаар авах арга хэмжээний тухай” УИХ-ын тогтоолын төслийг хэлэлцэх байсан ч хойшлуулав. Тус байнгын хорооны хуралдааныг УИХ-ын дарга З.Энхболд хойшлуулсан гэдгийг Эдийн засгийн байнгын хорооны дарга Ж.Батсуурь хэллээ.

Энэ талаар Монгол Улсын сайд М.Энхсайхан “ЭЗБХороо ТТ төслийг хэлэлцэх асуудлыг УИХ-ын даргын хүсэлтээр хойшлууллаа. Ажлын хэсэг байгуулах гэнэ” хэмээн нүүр хуудсандаа бичжээ. 

        Уг асуудлаар УИХ-ын Эдийн засгийн байнгын хорооны дарга Ж.Батсууриас тодрууллаа.

-Тавантолгойн гэрээг хэлэлцэх асуудлыг хэлэлцэх байсан боловч хойшлогдлоо. Ямар шалтгаанаар хэдий хүртэл хойшлогдсон бэ?

- Тавантолгойн хөрөнгө оруулалтын гэрээ хийгдэх гэж байгаатай холбогдуулан УИХ-ын тогтоолын төслийг өнөөдөр Эдийн засгийн байнгын хороогоор хэлэлцэх байсан ч түр хойшлууллаа. Учир нь УИХ-ын дарга захирамж гаргаж ажлын хэсэг байгуулж байна. Өнөөдөр УИХ-аас нэлээн олон хүнтэй ажлын хэсэг байгуулагдаж, гэрээ тогтоолын төсөлтэй холбогдуулан санал, дүгнэлт гаргана. Үүний дараа Эдийн засгийн байнгын хороо хэлэлцэх эсэхийг нь шийдвэрлэнэ. Намын бүлгүүд энэ асуудлыг хэлэлцэж, байр сууриа илэрхийлэх ёстой ч одоохондоо зарим намын бүлгийн шийдвэр гараагүй байна. Ер нь Тавантолгойн орд газрын ашиглах, гадаадын хөрөнгө оруулалт оруулах саналыг 2010 онд Засгийн газар болон УИХ-ын шийдвэр гаргасан байдаг. Үүнээс хойш олон улсын нээлттэй сонгон шалгаруулалт зарласан.

-Ажлын хэсгийн дүгнэлт хэдий хугацаанд багтаж гарах ёстой вэ?

-Ажлын хэсэг ямар хугацаанд дүгнэлтээ гаргахыг би хэлж мэдэхгүй. Засгийн газрын зүгээс УИХ-ыг яаралтай шийдэж өгөхийг хүсч байгаа. Гадны хөрөнгө оруулалт багассан, төсвийн орлого тасраад байгаа ийм цаг үед яаралтай горимоор хэлэлцэх ёстой гэж Засгийн газар бидэнд шилжүүлсэн. Ажлын хэсэг дүгнэлтээ түргэн гаргасан тохиолдолд Эдийн засгийн байнгын хороо хэлэлцэхэд бэлэн байна.

-МАН-ын бүлэг Тавантолгойн гэрээний асуудлыг хэлэлцсэн үү?

-Манай намын бүлэг Даваа гарагт хэлэлцээд Тавантолгойн гэрээг дэмжих нь зүйтэй гэдэг саналд нэгдэж дүгнэлтээ гаргасан.

-Ажлын хэсэгт ямар гишүүд орсон бэ?

-Ажлын хэсэгт хэн, хэн багтсаныг мэдэхгүй. УИХ-аас ажлын хэсэг байгуулна.

Т.Энхэлээ