Тавантолгойн гэрээний төслийн асуудлаар өнөөдөр УИХ-ын гишүүн Б.Батзандан болон аж ахуйн нэгжүүдийн нэгдлээс сэтгүүлчдэд хандаж мэдээлэл хийлээ.

Энэ үеэр  УИХ-ын гишүүн З.Батзандангаас зарим зүйлүүдийг тодрууллаа.

-Эдийн засгийн хямралаас болж яарч сандран монголчуудад ашиггүй гэрээний төсөл оруулж ирлээ гэх шүүмж явж байна. Үүнд ямар тайлбар өгөх вэ?

-Миний бие 2 жил гаруйн өмнө ЗГ-т эдийн засгийн зөв бодлого хэрэгжүүлэхгүй бол эдийн засаг чинь элгээрээ хэвтэх нь байна гэж албан бичиг хүргүүлж байлаа. Уул уурхайн орлогыг эмх замбараагүй зардаг, үйлдвэр барьдаггүй, олсон мөнгөө иргэдэд сонгуулийн амлалт болгоод үнэгүй тарааснаас болж ийм зүйл болж байна. Гэхдээ бидний буян заяа их эдийн засгийн өсөлт таван хувьтай байна. 60 сая малын буянаар монголчууд олон жил амьдраад ирсэн. Эдийн засгийн хямралыг далимдуулж хулгай хийж болохгүй. Ард түмний баялагыг шамшигдуулж болохгүй. Оюутолгой, Тавантолгойг эргэлтэд оруулах нь зөв. Гэхдээ монголчуудыг өрөнд оруулах замаар, ард түмний эрх ашгийг зөрчих байдлаар шийдэж болохгүй.

-Таныхаар бол  Тавантолгойн гэрээ хулгайн замаар явах нөхцөл бүрдлээ гэж  ойлгож болох уу?

-Тавантолгойн гэрээг Засгийн газар яг хулгайн замаар явуулах гэж байсан. Тэр хулгай нь илчлэгдсэн. Одоо УИХ-д ажлын хэсэг гараад сайжруулах талаар ярилцаж байна.

-Гэрээний зарим заалтууд  асуудал дагуулж байна. Таныхаар?

-Гэрээний заалтууд дээр зөрчилтэй маш олон зүйл байна. Наад зах нь гэхэд л стратегийн ач холбогдолтой ордын 51 хувь нь ард түмний мэдэлд байна гэсэн хуулийг зөрчиж байгаа. Эндээс бүх зүйл эхэлнэ.

Дашрамд хэлэхэд, УИХ-д Тавантолгойн гэрээний төсөл гэх ард түмний болон 500 гаруй аж ахуйн нэгжүүдийн эрхийг зөрчсөн хуулийн төсөл өргөн барьсан. Уг хөрөнгө оруулалтын гэрээ алдаатай болсон гэж Ж.Батзандан тэргүүтэй хүмүүс үзээд байгаа.

“Эрдэнэс тавантолгой” ХК-ийн зах зээлд гаргаад буй хувьцааны 15 хувийг эзэмшиж 2.1 сая иргэдийн 2.1 тэрбум хувьцаа, 553 ААН-ийн 8.5 сая ширхэг хувьцааг саналын эрхгүй болгож Монгол Улсын үндсэн хуулийн зүйл заалтууд, Компанийн тухай хуулийн 34 дүгээр зүйлийг зөрчиж хувьцаа эзэмшигчдийн үндсэн эрхийг хязгаарлан иргэдийг хохироох гэж байна хэмээн өнөөдрийн хуралд оролцогчид онцоллоо.

Иймд хувьцаа эзэмшигчдийн  эрхийг сэргээлгэхтэй холбоотойгоор хувьцаа эзэмшигчдээс санал авах юм байна.   Санал авах ажил маргааш, нөгөөдөр Чингисийн талбайд үргэлжилнэ.

Д.Ундрах /24tsag.mn/