Гадаад хэргийн сайд асан Г.Занданшатар мэдээлэл хийв. Тэрбээр “Үндсэн хууль ба зөвлөлдөх ардчилал” онол практикийн бага хурлыг ирэх сарын 3-ны өдөр Blue sky зочид буудалд зохион байгуулахаар болжээ. Уг бага хурлыг “Нэг Монгол” ТББ, Фридрих Эбертийн сангийн Монгол дахь төлөөлөгчийн газар, УИХ-ын   тамгын газар  хамтран зохион байгуулах юм байна.

Тэрбээр “Монгол Улс 1992 онд Үндсэн хуулиа баталснаас хойш 2000 онд тодорхой зүйл заалтад өөрчлөлт оруулсан.  Улстөрийн өнөөгийн нөхцөл байдал, төрд итгэх итгэл жилээс жилд муудаж байгаа нөхцөлд Үндсэн хуулиа эргэж харах  шаардлагатай гэж судлаачид үзэж байгаа. “Үндсэн хуульд өөрчлөлт оруулах Ажлын хэсэг байгуулагдаад ажиллаж байгаа юм билээ. Чухам ямар  байр суурьт хүрснийг мэдэхгүй байна. Олон улсад нэр хүндтэй эрдэмтэн судлаачид Монгол Улсад хариуцлагын тогтолцоо сул, итгэлцэл,  хариуцлагын  хямрал болсон гэж дүгнэдэг. Хариуцлага эзэнгүйдэж байгаа нь манай засаглалын олон толгойт хэлбэрээс  шалтгаалж байна гэж дүгнэсэн.  Ер нь бид асуудал  Үндсэн хуульдаа байна уу, Үндсэн хуулийг хэрэгжүүлэх  үүрэгтэй бусад процессийн хуулиуддаа байна уу гэдгийг энэ бага хурлаар олон талаас нь ярина. Үндсэн хуулийн цэцээс мөн илтгэл тавина. Энэ бол  нэлээн зөрчилтэй, маргаантай асуудал учраас өнөөдөр  Үндсэн хуульд ямар өөрчлөлт оруулах талаар  тодорхой ярих боломжгүй юм” гэв.

Бага хуралд “Үндсэн хууль ба зөвлөлдөх ардчилал” сэдвээр  Г.Занданшатар, “Үндсэн хуулийн эх үзэл санаа ба хэлэлцүүлгийн явц дахь өөрчлөлтийн үр дагавар” сэдвээр Саарландын их сургуулийн  профессор Торстен Штайн, “Үндсэн хууль дахь парламентын эрх мэдэл, хэрэгжилт, шийдэл” сэдвээр Үндсэн хуульд өөрчлөлт оруулах  ажлын хэсгийн гишүүн, УИХ-ынэ гишүүн Д.Лүндээжанцан нарын хүмүүс илтгэл тавих юм байна.

Монгол Улсад мөрдөгдөж буй 539 хуулийг янз бүрийн улс орны туршлагад  үндэслэн, хуулбарласан нь судалгаанаас харагдсан байна. Тухайлбал Төрийн албаны тухай хуулийг Канадаас, Авлигатай тэмцэх тухай хуулийг Хонгконгоос, Америк, Английн хуулиудыг түшиглэсэн байдаг аж. Энэ  байдал нь өнөөдрийн засаглалын хямралд нөлөөлж байгааг ч үгүйсгэхгүй гэж Г.Занданшатар хэллээ.

Т.Энхэлээ