МАН Засгаас гарах асуудлыг өчигдрийн бүлгийн хуралдаанаараа ярилцсан гэх мэдээлэл байгаа. Энэ талаар тус бүлгийн дарга С.Бямбацогтоос тодрууллаа.

Тэрбээр энэ талаар “Ардчилсан намаас томилогдсон Ерөнхий сайд МАН-ыг Засгийн газарт хамтарч ажиллаач гэж урьсан. Тэр "Өнгөрсөн хугацаанд хийж хэрэгжүүлж ирсэн бодлого, үйл ажиллагаа буруу байж. Энэ алдаагаа засч Засгийн газартаа хариуцлага тооцчихлоо. Цаашид улс орноо бодоод бидэнтэй хамтарч ажиллаач" гэж урилга ирүүлсэн. Удаа дараа бид уг асуудлаар бүлэг болон Удирдах зөвлөлийн хурлаараа хэлэлцэж байж шийдвэр гаргасан. Ингэж хамтрахдаа бид эдийн засаг, улс төр, сонгууль болон Үндсэн хуультай холбоотой асуудлаар гэрээ байгуулсан. Олон асуудлаар тохиролцсон. Энэ хүрээнд бид улс орноо бодож ажиллах шийдвэрийг гаргасан. Хэрвээ бид улс төрөө бодсон бол ийм шийдвэр гаргахгүй байсан. Ардчилсан нам будилж байх хооронд 2016 оны сонгуульд бэлдээд оноо авъя гэж бодож яваагүй. Бид гэрээнийхээ дагуу ажиллаж байтал нөхдүүд гэрээнд тусгагдсан зүйлүүдийг хэрэгжүүлэхээс тодорхой хэмжээнд цааргалах, татгалзах, хойшлуулах оролдлогууд гарч магадгүй юм байна. Ийм байдлаар явбал эдийн засгийн хямрал, хүндрэлээс гарах нь юу болох бол гэдэг асуудал бүлгийн хурал дээр яригдсан. Үнэхээр ойлголцож, тохиролцоод явах түнш мөн үү биш үү. Дээгүүрээ тэврэлдээд доогуураа өшиглөдөг гэдэг шүү дээ. Уг асуудал бүлгийн хуралд яригдсан байгаа. Гэхдээ албан ёсны шийдвэр гараагүй. Зарим гишүүдээс ийм санал гарсан” гэлээ.

Т.Хулан