Шадар сайд У.Хүрэлсүх Дэлхийн банкны Монгол дахь суурин төлөөлөгч Жим Андерсоныг хүлээн авч уулзаж гамшигаас урьдчилан сэргийлэх тал дээр хамтран ажиллахыг хүслээ.

Шадар сайд У.Хүрэлсүх хэлэхдээ “Японы Сэндай хотод өнгөрсөн гуравдугаар сард Гамшгийн эрсдлийг бууруулах дэлхийн бага хурал болсон. Энэ хурлын үеэр би НҮБ-ын Гамшигийн эрсдэлийг бууруулах газрын даргатай уулзаж, Монгол улсад айлчлахыг албан ёсоор урьсан. Тэрбээр энэ сарын 11-12-ны өдрүүдэд манай улсад айлчилал хийж байгаа. Энэ үеэр бид Гамшигийн эрсдлийг бууруулах өндөр дээд хэмжээний бодлогын хэлэлцүүлгийг зохион байгуулах гэж байна. Хэлэлцүүлэг энэ сарын 11-нд Төрийн ордонд болох бөгөөд холбогдох байгууллагын 400 гаруй хүн оролцох юм. Гамшгаас хамгаалах хамгийн чухал зүйл нь урьдчилан сэргийлэх. Тиймээс ард иргэддээ гамшгаас урьдчилан сэргийлэх боловсрол олгох нь чухал” гэлээ.  

Дэлхийн банкнаас Монгол Улсын Ерөнхий боловсролын сургуулиудын барилгад газар хөдлөлтөд хэр зэрэг тэсвэртэй байгаа талаар судалгааг хийсэн байна. Тус судалгаагаар манай сургуулиулуудын барилгын 58 хувь нь газар хөдлөлтөд тэсвэргүй, эрсдэлтэй гэсэн дүн гарчээ. Тиймээс гарч болох эрсдлээс урдьчилан сэргийлж, газар хөдлөлтийг урьдчилан мэдэх нь хамгийн чухал гэж төлөөлөгчид хэлэв. Дэлхийн банк Монгол Улстай гамшигаас урьдчилан сэргийлэх тал дээр хамтран ажиллаж, тусалж дэмжих болно хэмээн Дэлхийн банкны Монгол дахь суурин төлөөлөгч Жим Андерсон хэллээ.

Дашрамд сонирхуулахад, Улаанбаатар хот болон ойролцоо газруудад газар хөдлөлтийг урьдчилан мэдэх станцуудыг байгуулсан байна. Тэр станцуудаас ирсэн мэдээллээр Улаанбаатар хотод он гарснаас хойш  390 удаагийн газар хөдлөлт болсон байна. Хамгийн сүүлд Булган аймагт 3,7 балын газар хөдлөлт болжээ. Жил ирэх бүр газар хөдлөлтийн тоо нэмэгдэж байгаа хэмээн Шадар сайд хэллээ.

Т.Энхэлээ