Аль ч сайдын үед ад үзэгдэх болсон Замын цагдаагийн газрыг Улаанбаатар хотын Цагдаагийн газрын харьяалалд шилжүүлээд байгаа.

Энэхүү шийдвэрийг Хууль зүйн экс сайд Х.Тэмүүжин сүр дуулиантайгаар мэдэгдэж байсан нь саяхан. Нэг хэсэгтээ л татан буугдана гэх  айдастай явсан замын цагдаагийн алба хаагчид одоо л шинэ байдалтайгаа дасан зохицож байгаа. Гэтэл дахин тэднийг өөр газарт харьяалуулна гэх шум тарж эхэллээ.

Энэхүү шийдвэрийг шинэ сайд Д.Дорлигжав гаргаж байгаа нь ойлгомжтой. Түүний хувьд Х.Тэмүүжингийн хийсэн ажлуудыг нэг нэгээр нь, хэсэг хэсгээр нь баллуурдсаар байгааг олон нийт нүдээрээ харж, чихээрээ сонсож байгаа билээ.

Тэгвэл энэ удаад  Улаанбаатар хотын замын цагдаагийн газарт харьяалуулаад байсан Замын цагдаагийн газрыг  Нийтийн хэв журам хамгаалах газрын харьяанд байгуулахаар шийдвэрлэж буйг эх сурвалж мэдээллэв.

Х.Тэмүүжингийн үед Замын цагдаагийн газрыг үндсээр нь татан буулгах гэж байгаа мэт яриа дэгдэж байсан. Ингэхдээ бүр “4600 гаруй албан хаагчтай тэдний 60 гаруй хувь нь удирдах албан тушаал эрхэлдэг” гэх зэргийн мэдээлэл тархаж байсан.  

Тэгвэл үүнд Замын цагдаагийн газраас “Хэрэв бид ийм орон тоотой бол өнөөдөр хүн бүрт хүрч үйлчилж жолооч нарыг замын хөдөлгөөний хууль, дүрэм зөрчүүлэхгүйгээр нэг уулзвараас нөгөө уулзвар хүртэл 20 цагдаа гэрэлтүүлгийн шон шиг ярайтал зогсон ажиллах байсан биз. Гэтэл бодит амьдрал дээр Замын цагдаагийн газар 1990 оны бүтэц орон тоогоор одоог хүртэл албан үүргээ гүйцэтгэж байгаа. 1990 оноос хойш тээврийн хэрэгслийн тоо 8.5 дахин, авто замын сүлжээ 1.4 дахин өсөөд байхад Замын цагдаагийн албан хаагч 0.2 дахин өссөн байдаг. Өнөөдрийн байдлаар Улсын хэмжээнд Замын цагдаагийн 822 алба хаагч ажиллаж байгаагаас байцаагч 346, цагдаа зохицуулагч 476 байна. Үүнээс Нийслэл хотод 436 алба хаагч ажиллаж байгаа бөгөөд үүнээс байцаагч 201, цагдаа зохицуулагч 235 байна. Улсын хэмжээнд үүрэг гүйцэтгэж буй нийт алба хаагчдын 6.2 хувь нь удирдах албан тушаалтан байгаа”  хэмээн тайлбарлаж байсан билээ.

Гэвч Замын цагдаагийн газрыг нүсэр бүтэц, зохион байгуулалттай, ажил хийдэггүй олон албан хаагч байдаг мэтээр олон нийтийн дунд “бор шувуу”-г хэн нэгний зүгээс нисгэсээр өдгөө уг газар аль нэг газрын харъяа болж орхигдсон билээ.

Ийн аль ч дарга, сайдын үед ад үзэгдээд байдаг Замын цагдаагийн газартай холбоотой тодорхой баримт, санал сэтгэгдлүүдийг бид дараагийн удаад цувралаар хүргэх болно.

Харин энэ удаад дахин өөр газар харьяалуулахаар болж байгааг онцоллоо.

Дашрамд хэлэхэд, МУ-ын Засгийн газрын 2011 оны 05 дугаар сарын 11-ний өдрийн 153 тоот тогтоолоор баталсан “Цагдаагийн байгууллагын зарим ажил, үйлчилгээ, хангалтын жишиг норматив”-т зааснаар 350 автомашин тутамд 1 замын цагдаагийн алба хаагч, 150 км тутамд 1 байнгын хяналтын пост байхаар зааж өгсөн. Энэ тогтоолын хэрэгжилтээр өнөөдөр албан үүргээ гүйцэтгэж яваа замын цагдаагийн алба хаагчдын тоог 3 дахин нэмэгдүүлэх, техник хэрэгслийг 2.8 дахин нэмэгдүүлж байж өнөөгийн нөхцөл байдалд дөхөж очихыг учир мэдэх хүмүүс хэлж байна.  

24tsag.mn