Засгийн газрын ээлжит хуралдаанаар хэлэлцсэн асуудлуудын талаар Ерөнхий сайдын зөвлөх Ц.Мөнхтөр мэдээлэл хийлээ.
Засгийн газрын хуралдаанаар нийт 39 асуудлыг хэлэлцэж шийдвэрлэсэний дотор энэ сарын 16-18-ны өдрүүдэд Монгол улсад ажлын айчлал хийх Энэтхэгийн Ерөнхий сайд Н.Модигийн айлчлалтай холбоотой хэд, хэдэн асуудлыг хэлэлцжээ.
Энэтхэг, Монгол улсын харилцаа нь 2700 жилийн түүхтэй бөгөөд сүүлийн үед илүү эрчимжиж байгаа юм. Тиймээс энэ удаагийн айчлалаар нилээн олон хэлэлцээр, санамж бичигт гарын үсэг зурах үйл ажиллагааг зохион байгуулахаар бэлтгэж байгаа аж.
Тодруулбал, 2016-2020 оны хооронд Боловсрол, соёлын салбарт хамтран ажиллах хэлэлцээрт хоёр улсын салбарын сайдууд гарын үсэг зурна. Мөн Малын эрүүл, мэнд, Сүүний үйлдвэрлэлийн чиглэлд хамтран ажиллахаар болсон байна. Уг хэлэлцээрт Монголын талаас Хүнс, хөдөө аж, ахуйн сайд Р.Бурмаа гарын үсэг зурахаар болжээ. Агаарын тээврийн салбарт ч хамтран ажиллах хэлэлцээр хийхээр бэлтгэж байгаа аж. Мөн ялтан шилжүүлэх хэлэлцээр хийх бөгөөд уг хэлэлцээрт Хууль зүйн сайд Х.Дорлигжав гарын үсэг зурах юм байна.
Мөн гурван санамж бичгийг байгуулах юм байна. Энэтхэг улсын хөрөнгө оруулалтаар манай улсад дунд сургууль байгуулах ажил энэ айлчлалын үеэр яригдана. Уг сургууль нь “Дэлхийн удирдагчдыг бид бэлдэнэ” гэсэн уриатайгаар үйл ажиллагаагаа явуулах юм байна.
Т.Энхэлээ
