Манай улсад айлчилж буй Бүгд найрамдах Энэтхэг улсын Ерөнхийлөгч  Нарендра Моди УИХ-ын чуулганд  үг хэллээ.   

Тэрбээр “Энэтхэг, Монгол Улс хөгжлийнхөө нэн хариуцлагтай үед ирээд байна.  2000 жилийн тэртээ Энэтхэгийн лам нар энэ нутагт ирж, Монголын бурхан шашны төлөөлөл мөн оюуны мэдлэг эрэлхийлж, халуун Энэтхэгт очиж байсан.  Монголчууд Ази Европыг холбож байсан нь өнөөдөр ч дэлхий дахины  ой тоонд үлджээ. Түүхийн эргүүлгэд та бид соёл уламжлалаараа холбогдож чадсан байна. Өнөөдөр хоёр орны хоорондох харилцаа  олон зуун лам, оюутан залуусаар дамжин хүрч байна. Тавин  жилийн тэртээ Монгол Улсыг НҮБ-ын гишүүн орноор элсэх гэж байхад бид тууштай дэмжсэн билээ. Хоёр улсын  хүн хоорондын харилцаа эрчимтэй  байсан ч эдийн засгийн харилцаа  тийм ч  сайн байсангүй. Гэхдээ бидэнд боломж байгаа гэдэгт бүрэн итгэлтэй байна.   Жил хүрэхгүйн хугацаанд манай эдийн  засгийн өсөлт  7.5 хувьд хүрлээ.  Дэлхийн эдийн засаг сул байгаа үед хөдөлгөөнд оруулах шинэ эрч хүч болно гэж дэлхийн улс орнууд нэгэн дуугаар хэлж байна.  Энэтхэгийн эдийн засаг нэмэгдэх нь  Монголд ач тусаа өгнө. Хэдийгээр бидэнд орон зай ойлголцлын саад байдаг ч Монгол Улсын  газарзүйн байршил түншээ сонгох эрх чөлөөнд нь саад болж чадахгүй. Энэ өргөн уудам газар нутагт  сүү, сүүн бүтээгдэхүүний үйлдвэр хөгжүүлэх, боломжийн үнэтэй эрүүл мэндийн үйлчилгээ үзүүлэхэд  түншлэн ажиллаж чадна.  Монголд байгалийн болон оюун санааны боломж их байна. Түншлэлийн  хамгийн дээд хэлбэр бол хүний нөөц юм. Энэ нь тухайн улсыг хөгжлийнхөө төлөө тууштай байх боломжийг олгодог.  Би өнөөдөр ШУТИС-ийн дэргэд байгуулагдаж буй “Outsoucing”  төвийн шав  тавих ёслолын ажиллагаанд оролцоно. Энэ төв  цөмийн хамтын ажиллагааны анхны төв байх болно.  Мөн  дэд бүтэц, хүний нөөцийн салбарт  хамтран ажиллхаа  амласан. Бид бие биенээ дэмжиж ажиллаж чадна. Үүнд эргэлзэхгүй байна. Хил хамгаалал, кибер аюулгүй байдлын хүрээнд идэвхитэй хамтран ажиллахаар өнөөдөр тохирлоо. Бурхан буддагийн элч нар нэгэн үе энэрэнгүй үйлсээр Ази тивийг холбож байсан. Үндэстэн болгон өөрийнхөө засаглалыг яаж ч тодорхойлсон бай оюун санааны нийтлэг өв биднийг холбодог.  21-р зуунд  дэлхийг Ази   тив тэргүүлнэ гэж үздэг. Үл мартагдах дурсамж,  зөрчилтэй байдал энэ  тивд байсаар байна. Ирээдүйгээ бүтээх үүрэг хариуцлага энэ тивд ногдож байна. Би Монгол Улсын парламентын танхимын сүлд  дээр Бадамлянхуяа цэцэг байгааг олж харлаа. Энэ цэцэг манай намын бэлэг тэмдэг дээр бас байдаг нь хоёр улсын харилцааны учир холбогдлыг илэрхийлж байна” гэсэн юм.

УИХ-ын дарга З.Энхболд Энэтхэгийн Ерөнхий сайдад талархал илэрхийлснээр УИХ-ын хүндэтгэлийн чуулган өндөрлөлөө. Айлчлал үргэлжилж байна.

Г.Үжин