УИХ-ын чуулганы өнөөдрийн нэгдсэн хуралдаанаар “Засгийн газрын 2016-2018 оны өрийн удирдлагын стратегийг батлах тухай” УИХ-ын тогтоолын төслийн анхны хэлэлцүүлгийг хийлээ.

Уг төслийн талаар Төсвийн байнгын хорооны санал дүгнэлтийг УИХ-ын гишүүн Б.Болор танилцуулав.

Засгийн газрын өрийн удирдлагын дунд хугацааны стратегийг Дэлхийн банк, Олон улсын валютын сангийн хамтран бэлтгэсэн аргачлалын дагуу боловсруулдаг ба макро эдийн засгийн дунд, урт хугацааны төсөөлөлд үндэслэн Засгийн газрын өрийн багц дахь зардал, эрсдэлийн шинжилгээг хийдэг. Үүнд үндэслэн Засгийн газрын өрийн зорилтот багцын бүтэц,  шалгуур үзүүлэлтүүдийг тогтоодог бөгөөд үүгээр ирээдүйн зээллэгийн үйл ажиллагааг чиглүүлдэг юм. Ингэснээр Засгийн газрын санхүүжилтийн хэрэгцээг бага зардлаар, боломжит эрсдэлийн түвшинд хангах бодлогын орчин бий болдог байна. Эдгээр хууль зүйн үндэслэл, практик шаардлагад үндэслэн “Засгийн газрын 2016-2018 оны өрийн удирдлагын стратегийг батлах тухай” УИХ-ын тогтоолын төслийг боловсруулжээ.

Байнгын хорооны хуралдаанаар хэлэлцэх үед УИХ-ын гишүүн Ч.Улаан нарын гишүүд тогтоолын төслийн нэрийг “Засгийн газрын 2016-2018 оны стратегийн баримт бичиг батлах тухай” хэмээн өөрчлөх санал гаргасныг гишүүдийн олонх дэмжив.

Хэлэлцэж буй асуудалтай холбогдуулан УИХ-ын гишүүн О.Баасанхүү, “Энэ тогтоолын төсөл Чингис болон Самурай бондын өрийг оруулах уу эсхүл улсын нийт өрийг оруулах юм уу” хэмээн асуусан. Уг асуултад Сангийн сайд Ж.Эрдэнэбат, “Энэхүү баримт бичиг бол одоо байгаа өрийг яаж дарах вэ гэдэгт чиглэх юм. Баримт бичигт зөвхөн бондын бус улсын өрийг тусгана. Засгийн газрын өрийн босго 58.3 дээрээ байгаа. Нэмж өр тавихгүй” хэмээн хариулав.

Мөн УИХ-ын гишүүн Ө.Энхтүвшин, “Оюутолгойн өрийг манай улс төлөх үү хэмээн асуухад Сангийн сайд Ж.Эрдэнэбат, “Оюу толгойн өрийг манай улс төлөхгүй. Төсөл хэрэгжүүлж байгаа аж ахуйн нэгж нь хариуцна” гэсэн хариулт өгөв.

Асуулт хариултын дараа Төсвийн байнгын хорооноос оруулсан гурван зарчмын зөрүүтэй саналаар санал хураалт явуулахад хуралдаанд оролцсон гишүүдийн олонх  дэмжлээ. Ийнхүү тогтоолын төслийг эцсийн хэлэлцүүлэгт шилжүүлэхээр Төсвийн байнгын хороонд шилжүүлснээр чуулганы хуралдаан өндөрлөв.