Үндэсний хэмжээний хамгийн том сургууль болох МУИС гэх том айл өнгөрсөн жилжингээ хэрүүлтэй өнжсөн. Сургууль нэгтгэх, нэгтгэхгүйгээс эхлээд шинэчлэл хийх хийхгүй байх, салбар сургуулиуд, тэр дундаа МУИС-ийн захирлын томилгоо хүртэл үүнд багтсан. Гэтэл түр намжаад байсан захирлын томилгооны асуудал дахин сөхөгдлөө.

        МУИС-ийн Багш нарын холбоо сургуулийнх нь захирлыг хууль бусаар томилсон гэх гомдлыг Төрийн албаны зөвлөлд гаргасан байна. Холбооны зүгээс “БСШУ-ы сайд Л.Гантөмөрийн тушаалаар 2014 оны арванхоёрдугаар сарын 30-ны өдөр МУИС-ийн захирал А.Галтбаярыг ажлаас чөлөөлж, оронд нь Р.Бат-Эрдэнийг шууд томилсон. Уг нь төсөвт байгууллагын дарга, эрхлэгчийг нээлттэй сонгон шалгаруулах хуультай. Гэтэл салбар яамны сайд нь хуулиа зөрчөөд шууд томилгоо хийсэн” гэж үзжээ. Тиймээс Л.Гантөмөр сайдын энэ томилгоо хууль зөрчиж байгаа эсэх талаар Төрийн албаны зөвлөлд хандсан байна.

Төрийн албаны зөвлөлөөс өнгөрсөн сарын 26-ны өдөр энэ хариултыг ирүүлжээ.

ТАЗ “Төрийн үйлчилгээ, албаны удирдах албан тушаалд томилогдох ажилтны сонгон шалгаруулалтыг үнэлгээ, дүгнэлт гаргах зааврын дагуу төсөвт байгууллагын дарга эрхлэгчийг нээлттэй сонгон шалгаруулах журам үйлчилж байгааг анхааруулсан. Гэтэл томилгооны асуудлыг өнөөдрийг хүртэл шийдвэрлээгүй байгаа нь хууль дээдлэх зарчмыг алдагдуулж байна. Иймд МУИС-ийн захирлын албан тушаалд томилогдох удирдах ажилтны сонгон шалгаруулалтыг хууль тогтоомжийн хүрээнд зохион байгуулахыг үүрэг болгож байна” гэжээ.

Тиймээс МУИС-ийн багш нарын эсэргүүцэж буй, захирал Р.Бат-Эрдэнийг хууль бус томилгооноос чөлөөлж дахин МУИС-ийн захирлыг шинээр сонгох асуудал хэлэцэгдэх нь ойлгомжтой боллоо.

Харин БСШУ-ны сайд Л.Гантөмөрт хууль бус томилгоо хийж Монголын хамгийн том төрийн сургуулийг үймүүлсэнд нь ямар хариуцлага тооцохыг ард түмэн харж байна.

МУИС-ийн багш нар Р.Бат-Эрдэнэ захирлыг асар их эсэргүүцэж байна. Тус сургуулийн багш нарын холбооны тэргүүн П.Лхамсүрэнгийн ярьснаар уг хууль бус захирлыг эсэргүүцэхээс өөр аргагүй дараах нөхцөл байдал үүсчээ.

1. Өмнө нь оюутнууд мэргэжлээ сонгож элсээд тэр мэргэжпийнхээ дагуу 4 жил сурдаг байсан. Гэтэл одоо ерөнхий боловсролын сургууль, коллеж шиг эхний жил бүх оюутан ерөнхий хичээл үздэг болчихсон. Эхний жил 90 гаруй хичээлээс сонгож үзнэ. Дараагийн жил авсан оноогоороо уралдаад хүссэн ангидаа орно. Оноо чинь хүрэхгүй байна гээд огт сонирхдоггүй ангид нь оруулах нөхцөл бүрдчихсэн.

2. МУИС-ийн шинэчлэлд багш нарын саналыг огт тусгаагүй. Ерөөсөө л дээрээс даалгасан шинэчлэлийг хийх ёстой гэдэг хандлагаар ажиллаж ирсэн.

3. МУИС-ийн харьяанд байсан Улаанбаатар их сургуулийг Засгийн газрын тогтоолгүйгээр салбарын сайд нь дур мэдээд гаргачихсан. Гэтэл тэр сургууль магистр, докторын сургалт эрхлэх л зөвшөөрөлтэй байсан. Өөрөөр хэлбэл бакалаврын сургалт эрхлэх зөвшөөрөлгүй сургууль руу 300 гаруй оюутан явуулчихсан. МУИС-д элссэн 300 гаруй хүүхэд Улаанбаатар хотын их сургуульд ямар дипломтой төгсөх нь эргэлзээтэй л сурч байна.

4. МУИС-д МХЕГ-аас шалгалт хийгээд оюутан шилжүүлэх, төгсгөхдөө удирдлага ийм, ийм алдаа гаргажээ гээд дүгнэлтийг өнгөрсөн оны 6 сард гаргасан. Тэгтэл өнөөг хүртэл Мэргэжлийн хяналтын газрын даалгасан актыг биелүүлээгүй.

5. 2014 элсэлтээр тусгай зөвшөөрөл аваагүй 5 мэргэжлээр элсэлт зарлачихсан. Жишээлбэл тухайн үед зарласан Био инженер бэлтгэх хөтөлбөр өнөөг хүртэл батлагдаагүй. Био инженерийн ангид сурна гээд хууртагдаад элсчихсэн, нэгдүгээр курст сурч байгаа оюутан яах билээ.

6. Өнгөрсөн хавар гаргасан энэ алдаагаа энэ жил дахиад давтаж байна. Өөрөөр хэлбэл, магистр докторын хөтөлбөрөө зарлахдаа БСШУЯ- ны “Магистр, докторын хөтөлбөрт баримтлах нийтлэг шаардлага”-ыг зөрчсөн хөтөлбөрөөр элсэгчид авчихсан. Магистр, докторт сурч байгаа оюутнууд төгсөхөд манай сургуулийн хөтөлбөрийг хүчингүй болгочихвол хариуцлагыг хэн хүлээх билээ.

Жил бүр 5000 орчим оюутан элсүүлдэг Монголын үндэсний хамгийн том сургууль дээр дороо хөлөө олохгүй хагаралдаж байна. Хууль бус захирлыг халж шинээр захирал сонгон шалгарууллаа гэхэд өнгөрсөн хугацаанд гарсан энэ алдаануудыг хэн засч, хэн хариуцлага хүлээх нь бодох асуудал юм. Хууль зөрчиж захирал томилсон Л.Гантөмөр сайд, захирлынхаа үүргийг биелүүлэхдээ хууль зөрсөн Р.Бат-Эрдэнэ захирал нарт хэзээ хариуцлага тооцох вэ?

Г.Үжин