Үдээс өмнө чуулганы нэгдсэн хуралдаанаар Замын хөдөлгөөний аюулгүй байдлын тухай болон холбогдох бусад хуулийн төслийн эцсийн хэлэлцүүлгийг хийж батлав. Мөн газрын тухай хуульд нэмэлт оруулах хуулийн төслийг баталлаа.

Чуулганы хуралдааны өмнө саналтай гишүүд байгаа эсэхийг УИХ-ын дарга З.Энхболд асуухад Хууль зүйн байнгын хорооны дарга Д.Ганбат "Эрүүгийн тухай хуулийн төсөлөнөөдрийн хэлэлцэх асуудлууд дунд яагаад багтсангүй вэ" гэв. 

Тэрээр "УИХ-ын даргын дэргэдэх зөвлөл өнгөрсөн баасан гаригт хуралдаад Эрүүгийн тухай хуулийн төсөл /шинэчилсэн найруулга/, Зөрчлийн тухай хуулийн төслийн эцсийн хэлэлцүүлгийг энэ өдрийн чуулганы нэгдсэн хуралдаанаар хэлэлцэхээр жагсаалтад багтаасан байсан. Гэтэл өнөөдрийн хэлэлцэх асуудлаас хассан байна. УИХ-ын Хууль зүйн байнгын хороо өчигдөр хуралдаад Эрүүгийн хууль, Зөрчлийн хуулийг хэлэлцэж бэлтгэсэн. Овлигогүй хэдэн гишүүнээс болж, Эрүүгийн хууль гацах ёсгүй. Хуулиа ч олигтой уншаагүй байж. Бусад орнуудын Эрүүгийн хуулийг унших хэрэгтэй, нэг хүнээр удирдуулж байгаа Орос Эрүүгийн хуулиар бидний өмнө алхаж байна. Эрүүгийн хууль, Зөрчлийн хуулийг ахалж ажиллаж байгаа гишүүний хувьд хуулийг яаралтай батлах ёстой. Ингэхгүй бол ухамсар муутай хүчний байгууллагын нөхдүүдийн дарамтад аж ахуйн нэгжүүдийг үлдээнэ. Хууль зүйн байнгын хорооны хэдэн гишүүн байнгын хорооноос гарна гэсэн байна лээ, байнгын хорооноосоо гардаг юм бол УИХ-аас гараарай. Ажлаа хийж чадахгүй юм бол зайлаарай” гэлээ.

УИХ-ын дарга З.Энхболд “Байнгын хорооны гишүүдийг хөөх бол буруу. Нэр бүхий таван гишүүн өчигдөр надтай уулзаж, Хууль зүйн байнгын хорооноос гарах өргөдөл авчирч өгсөн. Дээрх гишүүд нь бүгд бүлэгтэй учраас бүлгийнхээ албан бланк дээр өргөдлөө бичиж ир гээд буцаасан. Эрүүгийн хуулийг жагсаалтаас хассан тухайд, Хууль зүйн байнгын хороогоор Эрүүгийн тухай хуулийн төслийг хэлэлцэхэд байхгүй гишүүдийн кнопыг дарж дэг зөрчсөн гэдэг асуудал үүссэн учраас хассан. Наадмаас өмнө чухал хуулийн төслийг яаруу сандруу баталж болохгүй, наадмын дараа ажлын хэсэг нь сайн ажиллах ёстой" гэсэн юм.

Уг хуулийн төслийг УИХ-ын гишүүн Н.Алтанхуяг санаачлан өргөн барьсан юм. Түүний санаачилсан уг хуулийг өмнө нь хэлэлцэх асуудлаар хасч байсан удаатай билээ.

Т.Энхэлээ