УИХ-ын хаврын ээлжит бус чуулган өнөөдөр өглөө 10 цагт эхэлсэн ч чуулганы нээлтэд 76 гишүүний 41 гишүүн оролцсон.

Харин чуулганы хуралдаанд МАН-ын 26 гишүүн оролцохоос нэг ч гишүүн хуралдаандаа ирээгүй билээ. Энэ талаар УИХ дахь АН-ын бүлгийн дарга Б.Гарамгайбаатарын байр суурийг сонслоо. 

УИХ дахь АН-ын бүлгийн дарга Б.Гарамгайбаатар

-Чуулганы хуралдаанд МАН-ын гишүүд оролцсонгүй. Танай намын зүгээс үүнийг юу гэж харж байна вэ?

-УИХ-ын гишүүдийн ажил бол чуулган болон байнгын хороодын хуралдаанд суух, хэлэлцэж байгаа асуудалд идэвхитэй оролцох ёстой. УИХ дахь МАН-ын бүлгийн гишүүд өнөөдөр чуулганы хуралдаанд бүрэн бүрэлдэхүүнээрээ суусангүй. Энэ нь юуг харуулж байна вэ гэхээр тэд зөвхөн сандал ширээгээ хамгаалахын төлөө шантааж хийж байгаа юм шиг харагдаж байна. МАН-ын гишүүдгүйгээр УИХ-ын чуулган үйл ажиллагаагаа явуулах бүрэн боломжтой гэдэг нь өнөөдөр харагдлаа.

-Ерөнхий сайд Ч.Сайханбилэг намынхаа ҮЗХ-г хуралдуудах шаардлагыг намынхаа даргад хүргүүлсэн. Бүлгийн даргын хувьд та энэ асуудалд ямар байр суурьтай байгаа вэ?

-Одоогоор Ерөнхий сайд Ч.Сайханбилэг намынхаа дарга З.Энхболдод өөрийнхөө хүсэлтийг илэрхийлж, шаардлага хүргүүлээд байна. Тэгэхээр энэ асуудлыг намын дүрэм, журмаар шийднэ. Харин сайд нарыг чөлөөлөх болон томилох асуудлыг ээлжит бус чуулганы хугацаанд шийдвэрлэнэ гэж бодож байна.