Өнгөрсөн долоо хоногт улс төрийн амьдрал халуухан өрнөв. Долоон сарын өмнө хамтарсан Засгийн газар байгуулан улс орноо сэргээн мандуулаад өгнө гэж байсан хоёр нам салж, эрх баригчид МАН-ыг гэрээ биелүүлээгүй гэдэг үндэслэлээр огцрууллаа. Харин МАН-ын зүгээс хүчтэй сөрөг хүчин болж ажиллана гэж мэдэгдсэн нь олны анхаарлыг ихээхэн татаад байна.

Энэ мэт улс төрийн шинэ бужигнааны үед МАН-ын дарга М.Энхболд өөрийн байр суурийг хэрхэн хүргэснийг хүргэе.

Тэрбээр хэвлэлд өгсөн ярилцлагадаа “Хамтарсан Засгийн газрын гэрээний хэрэгжилтийг дүгнэхдээ туйлын хариуцлагагүй хандсан. Зүй нь бол тус гэрээний хэрэгжилтийг хоёр нам хамтарч дүгнэхээс гадна Засгийн газар өөрөө мөн дүгнэх ёстой байсан. Гэрээнд заагдсан асуудлуудаас хэд нь хэрэгжсэн, хэд нь хэрэгжээгүй гээд яагаад дүгнэлт хийхгүй байгаа нь хариуцлагагүй ажилласаных юм. Хэрвээ гэрээгээ үнэн бодитоор дүгнэсэн бол АН өөрсдөө гэрээгээ биелүүлээгүй гэдэг нь ил тод болох байсан учраас Гүйцэтгэх зөвлөлийнхөө хангалтгүй гэсэн үгийг урдаа барьсаар байгаад цуцаллаа” гэж хэлжээ.

Ер нь гэрээг дангаараа цуцалсанд бус дүгнээгүйд МАН-ынхан бухимдалтай байгаа гэнэ. Тус намынхан өөрсдөө хамтарсан Засгийн газрын гэрээг дүгнэж үзэхэд 50 орчим хувийн биелэлттэй байжээ. Харин үлдсэн нь МАН-аас бус АН-аас болж биелээгүй талаар тус намын дарга М.Энхболд онцоллоо. Тухайлбал, “Оюутолгой”, “Тавантолгой”-н гэрээний төслийг УИХ-ын дарга З.Энхболд түгжиж, гацаасны улмаас Засгийн газар гэрээгээ татаж авсан гэж тэрбээр ярьжээ.

Ер нь МАН-ын гишүүд өнгөрсөн хугацаанд идэвхтэй сайн ажилласан талаар тэрбээр мөн дурьдсан байна. Тодруулбал, МАН-ын бүлгээс дэвшүүлсэн 50 тодорхой саналыг багтаасан 70 орчим зүйл бүхий эдийн засгийн хүндрэлийг даван туулах хөтөлбөр баталжээ. Мөн Сангийн сайд Ж.Эрдэнэбат Өрийн хэмжээг нэмэхгүй байх асуудалд санаачлагатай ажиллаж, Өрийн удирдлагын хууль эрх зүйн орчныг боловсронгуй болгох хуулийн төслийг өргөн мэдүүлж батлуулсан байна.

Ер нь улс орны эдийн засагтай холбоотой хэд, хэдэн чухал хуулийн төслийг МАН биш АН гацааж ирсэн талаар тус намын дарга онцлов.

Тэрбээр мөн “Бид шинээр орж ирэх сайд нарыг нь томилолцож өгнө. Харин сайн ажиллах хүмүүс орж ирээсэй гэж хүсч байна. Ер нь УИХ-ын гишүүн давхар дээл өмсөх гэж байгаа бол анхнаасаа сайд болмоор байна, давхар дээл өмсмөөр байна гэж хэлэхэд болно биз дээ. Гэтэл огт юм яриагүй байгаа МАН-ыг Засгийн газрыг огцруулах гэж байна гээд хэлээд өөрсдийнхөө хүсэл зорилгыг биелүүлж байгаа нь үнэхээр увайгүй үйлдэл” гэж ярьжээ.

Цаашлаад тус нам энэ Засгийн газарт зөв зүйл дээр нь ташуур өгч, буруу зүйл дээр нь хазаар болж ажиллана гэдгийг ч мөн тэрбээр сануулсан байна.

Т.Энхэлээ