Сайд нарын нэрс тодорхой болсон эсэх асуудлаар АН-ын бүлгийн дарга Б.Гарамгайбаатараас тодрууллаа. Дашрамд дурдахад, тус бүлэг нь өнөөдөр 10.00 цагаас хуралдах байсан ч хуралдаан тодорхойгүй хугацаагаар хойшлоод байна.

-Зургаан сайдын нэр тодорхой болсон уу?

-АН-ын бүлгийн хурлыг тодорхойгүй хугацаагаар хойшлуулаад байна. Учир нь "Шударга ёс" эвслийн бүлгийн шийдвэрийг хүлээж байна. Үүний дараа манай бүлэг хуралдаж, энэ долоо хоногт хэлэлцэх хуулийн төсөл болон Засгийн газрын асуудалд ямар байр сууриар оролцох вэ гэдгийг шийдвэрлэнэ.

-Зургаан сайдын хувиарлалт тодорхой болсон уу. Тухайлбал танай нам хэдэн яамыг авах вэ?

-Одоогоор энэ асуудал тодорхой болоогүй байна. “Шударга ёс" эвслийн саналыг сонссоны дараа манай нам саналаа гаргана.

-УИХ-ын зарим гишүүдээс Б.Наранхүү гишүүнийг Зам тээврийн сайд болгох хүсэлтийг тань руу ирүүлсэн гэсэн. Энэ талаар мэдээлэл өгөөч?

-Залуучуудаас тийм бичиг ирсэн нь үнэн. Манай намын дарга АН-ыг фракцгүй болсон гэж тодорхой хэлсэн. Хэн сайд болохыг шийдэх хүмүүс нь Ерөнхий сайд, намын дарга шүү дээ.

-Бие даагчдыг засагт хамтраач гэж урьсан уу?

-Мэдэхгүй байна. Миний хувьд одоогоор энэ асуудлаар уулзсан зүйл байхгүй.

- Таныг Сангийн сайд болно гэсэн мэдээлэл байна?

- Тэр талаар би өөрөө ч сонсоогүй байна.

Т.Хулан