Хөдөлмөрийн Үндэсний нам өөрийн намын байран дээр хэвлэлийн бага хурал хийлээ. 

Тус намынхан саяхан УИХ-аар батлагдсан Өршөөлийн тухай хуулийн талаар байр сууриа илэрхийлэн цаашид авах арга хэмжээнийхээ талаар танилцуулав.

Хөдөлмөрийн Үндэсний намын дарга С.Боргил “Өршөөлийн тухай хууль батлагдсан гэж байгаа ч зүйл заалтууд нь нууцлагдмал хэвээр байна. Монголын нийгмийн өөрийнх нь үнэт зүйл болсон шударга ёс, нийгмийн суурь болсон тэгш байдлыг арилжаалж өршөөлийн хэлбэрт оруулж болохгүй. Тиймээс бид энэ хуулийн талаар УИХ-д суудалтай намуудад шаардлага хүргүүлж байна. Түүнчлэн Үндсэн хуулийн цэцэд хандан өргөдөл гаргаж байгаа” хэмээн мэдэгдлээ.

Тус намынхан Ардчилсан парламентын 25 жилийн ойд зориулан гаргасан гэх Өршөөлийн хууль нь 25 жилийн төрийн бодлогыг хөсөр хаян улс төрчид, эрх баригч намуудын албан тушаалтнуудад зориулж гаргасан хууль болсон гэж үзэж байгаа аж. Иймд  Өршөөлийн хуулийн үйлчлэлээс авлига, албан тушаалын гэмт хэргийг  гаргахыг шаардаж ийнхүү мэдээлэл хийсэн юм.