Ирэх долоо хоногт УИХ-ын чуулганы ээлжит бус хуралдаан дахин болно. Хуралдаанаар МАН-ын зургаан сайдын орны хүмүүсийг томилох юм. Сайд нарт нэр дэвшигчид одоогоор тодорхой болоогүй ч ирэх долоо хоногийн эхээр нэрс өргөн баригдах байх гэсэн хүлээлт байна. Одоогийн байдлаар “Шударга ёс” эвслийн бүлэг Засгийн газарт 4 сайдын суудал нэхсэнээс болж АН-тай тохирч чадахгүй байгаа гэх мэдээллийг эх сурвалжууд өгч байна. Хэрвээ нэр дэвшигчдийн нэрсийг өргөн барьчихвал УИХ-ын ээлжит бус чуулганыг зарлаж томилгооны асуудлыг хэлэлцэж шийдвэрлэх юм. Мөн Ерөнхийлөгч Ц.Элбэгдорж өнгөрсөн долоо хоногт Өршөөлийн тухай хуульд хориг тавихаа мэдэгдсэн учраас хоригийн асуудлыг ээлжит бус чуулганы хуралдаанаар хэлэлцэнэ.

УИХ-ын дарга З.Энхболд энэ талаар ярихдаа “Өршөөл үзүүлэх тухай хуульд Монгол Улсын Ерөнхийлөгч хориг тавихаа мэдэгдсэн тул энэ хоригийг хэлэлцэхийн тулд дахин ээлжит бус чуулган зарлан хуралдуулах шаардлага гарч байгаа, түүнчлэн Засгийн газар өргөн мэдүүлсний дагуу шинээр томилох 6 сайдын асуудлыг ээлжит бус чуулганаар хэлэлцэн шийдвэрлэх болно” гэсэн билээ.

Тэгэхээр ирэх долоо хоногт УИХ-ын үйл ажиллагаа олны анхаарлыг татсан үйл явдлуудаар дүүрэн өнгөрөх нь.

Учир нь хөөгөөд явуулсан МАН-ын зургаан сайдын оронд хэнийг томилох вэ гэдэгт олон нийт анхаарлаа ихээхэн хандуулж байгаа. Мөн Сонголтгүй болсон АН-ынхан “Шударга ёс” эвсэлд нэхээд буй дөрвөн сайдынх нь суудлыг өгч амаа барих уу эвсэл тохироод явах уу тохирлоо гэхэд яаж тохирох вэ гэдгийг ард түмэн анхааралтай ажиглаж байна.

Н.Энхбаяр тэргүүтэй авлигачдыг өршөөсөн хуулийг Монголын төрийн босгоор алхуулахгүй хэмээн ширүүхэн мэдэгдсэн Ерөнхийлөгчийн хориг УИХ-ын чуулганаар дэмжлэг авч чадах эсэх нь ч мөн олны анхаарлыг ихээхэн татаж байна. Ерөнхийлөгч Ц.Элбэгдорж уг хуулийн авлигачдыг өршөөх заалтууд дээр хориг тавина гэсэн. Тэгэхээр уг хуульд хэсэгчилж хориг тавьж магадгүй байгаа юм.

Түүний хэлж буйгаар уг хуулиар анх удаа гэмт хэрэг үйлдсэн хүн, хүүхэд, эмэгтэйчүүд, хөнгөн гэмт хэрэг үйлдсэн хүмүүс өршөөгдөх ёстой гэж байгаа юм.

Хэрвээ Ерөнхийлөгчийн хориг УИХ-ын дэмжлэгийг авч чадвал уг хууль хэсэгчилж буюу авлигачдыг өршөөх заалтууд нь хүчингүй болох юм.

Т.Энхэлээ