“Эх орон-36” хөтөлбөрийн ээлжит сургалт өнгөрсөн амралтын өдөр /2015.08.15/ эхэлж “UB plac” төвийн үүднээс Олон улсын Хүүхдийн “Найрамдал төв рүү хөдөллөө.
Хүн амын хөгжил, нийгмийн хамгааллын сайд С.Эрдэнэ, УИХ-ын гишүүн С.Одонтуяа нар хүүхэд, өсвөр үеийхэнд эх оронч үзэл төлөвшүүлэх, эр зоригийн чадваруудыг эзэмшүүлэх "Эх орон 36" хөтөлбөрийг санаачилж, 2013 оноос хэрэгжүүлж эхэлсэн.
Уг хөтөлбөрийн гол зорилго нь Монгол хүүхэд бүрийн ур чадварыг хөгжүүлж бүтээлч сэтгэлгээтэй, оюунлаг, өрсөлдөх чадвартай иргэн төлөвшүүлхэд чиглэж байна. Хөтөлбөрийг хэрэгжүүлэхдээ Хүн амын хөгжил, Нийгмийн хамгааллын яам, Батлан хамгаалах яам, Хүүхдийн төлөө үндэсний газар, Олон Улсын хүүхдийн "Найрамдал" зуслан, Хил хамгаалах 151-р анги, Монголын Улаан загалмайн нийгэмлэг, Монголын Скаутын холбоо, Онцгой байдлын Ерөнхий газар, Зэвсэгт хүчний жанжин штаб, Нийслэлийн Замын цагдаагийн газар зэрэг байгууллагуудтай хамтран зохион байгуулдаг.
Хөтөлбөр хэрэгжиж эхэлснээс хойш 2014 онд улсын хэмжээнд 10,995 хүүхэд хамрагдаад байсан юм. Энэ жил “Эх орон-36” хөтөлбөрт 8000, явуулын сургалтаар 4000 гаруй нийт 12 мянга орчим хүүхэд, өсвөр үеийнхнийг хамруулахаар төлөвлөсөн тухай Монголын үндэсний олон нийтийн цахим хуудсанд мэдээлж байсан. /http://mnb.mn/i/51095/ Харин энэ удаагийн хөтөлбөрөөр 380 хүүхэд хамрууллаа.
Уг хөтөлбөр нь 36 цагийн дотор 36 төрлийн цогц мэдлэгүүдийг өртөөчилсэн хэлбэрээр явуулдгаараа онцлогтой. Хөтөлбөр жилээс жилд хүрээгээ тэлж орон нутгийн хүүхдүүд олноор хамрагддаг болсон нь уг хөтөлбөрийн ямар үр дүнтэй явагдаж байгааг харуулж байна.
С.Одонтуяа: Өсвөр үеийнхэнд хамгийн их тулгамдаж байгаа зүйл бол төлөвшил болон эх оронч үзэл
-“Эх орон 36” хөтөлбөрийн ач холбогдолыг тодруулж өгөөч?
-“Эх орон 36” хөтөлбөр нь 36 цагийн дотор амьдралд хэрэг болох 36 дадлыг хүүхдүүдэд олгодог. Өсвөр насны хүүхдүүд энэ хөтөлбөрт хамрагдснаар аливаа бэрхшээлийг даван туулахад хүнд ямар чадвар суух ёстой вэ гэдгийг мэдэх, эх орон гэж юу вэ, яагаад эх орноо хайрлах ёстой юм бэ гэдгийг мэдрэнэ. Эх орон гэдэг эх гэдэг үгээс үүдэлтэй. Тийм ч учраас амьдралын эхлэлийг тавихад зайлшгүй хэрэгтэй ухаан төлөвшил, тэсвэр хатуужилтай болж чадах нь чухал. Энэ хөтөлбөр маань хэрэгжээд гурван жил болж байна. УИХ–ын гишүүн С.Эрдэнэ бид хоёр анх санаачилсан. Анх өөрсдийн нөөц бололцоог ашиглан цөөн хүүхэдтэй хөтөлбөрийг эхлүүлж үр дүнг дүгнээд УИХ–аар хэлэлцүүлж, төсөл хөтөлбөр болгон хэрэгжүүлэх болсон.
Өнөөдөр монголын хүүхдүүдэд хамгийн их тулгамдаж байгаа зүйл бол төлөвшлийн хүмүүжил, эх оронч үзлийн хүмүүжил. Мөн өөрөө бие дааж аливааг хийх чадвар үнэхээр их дутагдаж байгаа. Тиймээс энэ хөтөлбөрийг эрчимтэй явуулж байна. Хүний амьдралд математик, физикийн хичээлийн мэдлэг хааяа л хэрэг болдог. Харин амьдрах ухаан, төлөвшил, хүмүүжил, эх оронч үзлийн сургалт хүний амьдралд насан туршид нь хэрэг болно. Энэ хөтөлбөр улс орон даяар хэрэгжээд эхэлсэн байгаа. Сургагч багш бэлдэж чадлаа. Монголын хүүхдүүдэд өнөөдөр “За” гэж хэлэх юм бол хүүхдүүд маань ирээдүйд эх орныхоо төлөө “За” гэж хэлнэ гэдэгт итгэлтэй байна.
-Орон нутагт хэрхэн хэрэгжүүлж байгаа вэ?
-Одоогоор 10 гаруй аймагт хэрэгжиж байгаа. Аймгийн зуслангуудад үргэлжлэх боломж олгохын тулд 200 гаруй багш бэлдсэн. Ер нь даяаршлын энэ эрин зуунд гадаадын улс орноос юуг ч авч болж байна. Мөнгөгүй бол мөнгө зээлж байна. Техник технологи хэрэгтэй бол оруулаад ирж байна. Ажиллах хүч ч авч байна. Гэтэл монгол орныхоо төлөө эх оронч сэтгэлээр зүтгэх төлөвшил хүмүүжилтэй иргэдийг бэлтгэхийн тулд бид өнөөдөр л хүүхдүүддээ зориулан хөрөнгө мөнгө зарах ёстой. Энэ бол хаанаас ч олдошгүй үнэт зүйл болсон монгол хүнээ бэлдэх тухай асуудал юм. Тиймээс төр засаг анхааралдаа авсаар байвал энэ хүүхдүүд ирээдүйд эх орноо аваад явна.
-Санхүүжилтийг хэрхэн шийдэж байгаа вэ?
-Улсын төсвөөс гаргадаг болсон. Нэг хүүхэд жилд удаа хамрагддаг. Цөөн тохиолдолд дахин хөтөлбөрт хамрагдаж байгаа.
